Pompeop Lavrovillu siunissami suleqatigiissinnaanissartik isumalluarfigigaat
![](/sites/default/files/styles/image_934x467/public/scan_foto_sputnikritzau.jpg?itok=G98v1jOZ)
Amerikamiut nunanut allanut tunngasunut ministeriata Mike Pompeop Ruslandimilu illuatungaata Sergej Lavrovip oqaloqatigeereernerisa kingornatigut tamanna nalunaarutigineqarpoq.
Sortehavip eqqaani illoqarfimmi Sotjimi Pompeop russit præsidentiat Vladimir Putin ullumi kingusinnerusukkut naapissavaa.
- Præsident Donald Trumpip Ruslandimut attaveqarnerup pitsaanerulernissaa kissaatigimmagu maaniippunga, Pompeo nutaarsiassaqartitsivik Reuters naapertorlugu oqarpoq.
AAMMA ATUARUK Ruslandip Kinallu Issittumi inissisimanerat Pompeop isornartorsioraa
Aamma Lavrovip USA-mut attaveqarnerup nutaanngorsarnissaa akuersaartumik nipilimmik oqaatigaa.
- Illuatungeriinni pasilliinerit akerleriinnerillu amerliartortut takoreerpavut. Taamatut ineriartorneq angusaqarfiunngilaq, Sergej Lavrov oqarpoq.
Moskvap Washingtonillu nunanut allanut tunngasunut qullersaasa ataatsimeeqatigiinnerat ukiup ataasingajaap ingerlanerani taama qutsitsigisumik inissisimasut akornanni siulliuvoq.