Politikkikkut pissanganartoqarfiusumi, naalagaaffiit Nuummi ataatsimiinnerat
Naalakkersuisut siulittaasuata Jens-Frederik Nielsenip (D), ministeriunerup Mette Frederiksenip (S) Savalimmiormiullu lagmandiata Beinir Johannesenip (Fólkaflokkurin) ukiup affaanut ataatsimiigiarlutik Nuummiinneranni, politikkikkut isumaqatiginninniarnissamut, assiliseqatigiinnissamut pinngortitamullu pisuttuaqatigiinnissamut piffissaqartoqarpoq.
Nunatta, Savalimmiut Danmarkillu suleqatigiinnerisa nunarsuarmi politikkikkut annertoorujussuarmik tatineqarnerani ataatsimiipput.
USA-lli præsidentiata Donald Trumpip nunarput aqukkusullugu nalunaarutigeqqikkaalu, nunat taakku pingasut suleqatigiinnerulerusupput.
Tamanna ullormi pisimasut tunngavigalugit paasinarsivoq.
Isumannaallisaaneq pingaarnerusoq
Naalakkersuisut siulittaasui taakku pingasut Nunanut Allanut, Sillimaniarnermut Illersornissamullu Politikkikkut Suleqatigiissitami marlunngorpat ataatsimiissapput.
Tassani Danmarkip nunanut allanut, inatsiseqarnermut illersornissamullu ministerii peqataassapput, ataatsimiinnermilu Atlantikup avannaani Issittumilu isumannaallisaanikkut inissisimaneq ilaatigut sammineqassalluni.
Tamanna nunatsinni sakkutooqarnerulerniarnerup nalaani pivoq.
Danmarkip sakkutuujusussaatitaasut 100-t missaanniittut qanittukkut nunatsinnukartippai. Taakku qaammatini aqqanilinni pilersaarutigineqartumut, siorna saqqummiunneqartumut, atatillugu Nuummiipput Kangerlussuarmiillutillu.
Nunarpullu, nunat tamalaat sakkutuuinit annermik sungiusarfittut ulluni makkunani atorneqarpoq.
Sakkutuut 400-t nunatsinniittut
Sungiusarneq Arctic Shield-imik taaguuserneqarsimasoq ataasinngornermi aallartissaaq, tassani sakkutuut nunanit NATO-mut ilaasortanit qulineersut 400-t missaanniittut peqataassapput.
Sungiusarneq nunatta annersaani pissaaq, sakkutuullu Issittumi annermik sungiusarnerannut ilaassalluni.
Taamaattumik ataatsimiinneq Naalagaaffeqatigiinnermi ulluinnarni suleqatigiinnermut taamaallaat tunnganngilaq.
Sillimaniarnermut politikki siornatigornit pingaaruteqarneruvoq.
Mette Frederiksenip oqarnera naapertorlugu, suleqatigiinnerup piffissami nalunartoqarfiusumi misilinneqaatigissavaa.
- Qaniginerpaasagut nunarsuup allanngoriartupiloornerani peqatigissavagut, ministeriuneq tusagassiuutinut nalunaarummi oqarpoq.
Nunatta, Savalimmiut Danmarkillu ataatsimoornerani ’nukittuffigineqartut’ erseqqissaatigai.
- Toqqaannartumik tatigeqatigiillutalu ataqatigiinnerput nukittuffigaarput. Ilungersunartut pillugit ammaffeqatigiittarnerput. Assigiinngissuseqaraluarlutalu ataqatigiissuteqarnitta tungaatigut paaseqatigiissinnaanerput, danskit ministeriunerat oqarpoq.
Ataatsimeereernermi qaqqamukarneq
Ilungersunartut eqqartorneqaraluartut, sillimaniarnermut politikki taamaallaat ullormut pilersaarutigineqanngilaq.
Naalakkersuisuni siulittaasut taakku pingasut, Hans Egedep Illuata eqqaani nal. 14.30 assiliseqatigiissapput.
Taamaaleriarlutik Qooqqunukassapput, tassanilu Nuummukaqqinnginnerminni pisuttuassallutik.
