Jens-Frederik Nielsen Naalagaaffeqatigiit Savalimmiuni ataatsimiinneranni peqataasoq

Naalagaaffeqatigiit ataatsimiissammata, naalagaaffeqatigiinni naalakkersuisut siulittaasui pingasut, Jens-Frederik Nielsen (D), Aksel V. Johannesen (Socialdemokratiet) aamma Mette Frederiksen (S),  maannakkorpiaq Savalimmiuniipput.

- Politikikkut aningaasaqarnikkullu soqutigisatta pingaaruteqaqisut uani ataatsimoorussatsinni eqqartornissaat qilanaaraara. Ilutigisaanillu nunatta soqutigisai aallaavigalugit sulissaanga, Jens-Frederik Nielsen tusagassiutinut ataatsimiinnissaq sioqqullugu oqarpoq.

Nunat pingasut siuttuisa suut oqaloqatigiissutigissaneraat ilisimaneqanngilaq, Danmarkilli ministeriuneqarfia allappoq, suleqatigiinneq sillimaniarnerlu oqaluuserisassaasut. Mette Frederiksen Naalagaaffeqatigiit ataatsimiitsinnagit oqarpoq, Naalagaaffeqatigiinneq nunanut pingasunut tamanut isumaqartussanngorlugu nutarsagassaasoq. 

Sillimaniarneq Nunanut Allanut, Sillimaniarnermut Illersornissamullu Politikikkut Attaveqarnermut Ataatsimiititaliaq aqagu marlunngornermi ataatsimiippat oqallisigineqassaaq.  

Tassani ilaatigut Aningaasaqarnermut Akileraartarnermullu Naalakkersuisoq Múte B. Egede aamma Nunanut Allanut Ilisimatusarnermullu Naalakkersuisoq, Vivian Motzfeldt nunatsinniit peqataassapput, soorluttaaq danskit savalimmiormiullu aqutsisui ministerillu aalajangersimasut peqataassasut.