Politikkikkut naliliisartoq: Siumut IA-lu naalakkersuisooqatigiilerpata partiit sinneri oqaaseqarsinnaanerat annikillissaaq

Nunatta aningaasaqarniarnerata aaqqiivigineqapallannissaa anguniarlugu nunatsinni partiit anginersaasa, Siumut aamma Inuit Ataqatigiit, naalakkersuisooqatigiilernissaat GA-mit danmarkimilu kissaatigineqarpoq. Taamaaliornissarli arlalinnik akornuteqarsinnaasoq politikkikkut naliliisartoq isumaqarpoq.
Sara Olsvig & Kim Kielsen Assi © : KNR
Allattoq Sara K. Jakobsen
decembarip 02-at 2014 18:27

 

Siumup naalakkersuisunngortitsinissaq siunertaralugu partiinik allanik isumaqatiginniarnini ingerlatileruttorpaa. Siumut Inuit Ataqatigiillu suleqatigiilersinnaanerat neriuutigineqaqaaq, ilaatigut nunatsinni sulisitsisut peqatigiiffiannit danskillu partiivinit.

 

Aamma atuaruk Christiansborgimit qisuariaatit

Aamma atuaruk Kim Kielsen kimigiiserfigineqartoq


Politikkikkut naliliisartup isumaqataagaluarluni taamaliornikkut arlalinnik akornuteqarsinnaasoq oqaatigaa.


- Siullermik Siumut IA-llu isumaqatigiinniarnissaat, pingaarnerit taakku akerleriissutigisartagaat uranimut taasititsinissaq pillugu aammalu aalisarnerup tungaatigut, taakku suleqatigiinniarnissaannut apeqqutaalissapput qanorlu imminnut naaperiarsinnaatiginersut, politikkikkut naliliisartoq, Inunnguaq Petrussen KNR-imut oqarpoq.


Qinigaaffillu tamaat suleqatigiissinnaasariaqartut attanneqarsinnaasunillu iluarsaaqqissinnaasariaqartut aamma oqaatigaa. Partiit anginerit suleqatigiilissappata, tamarmik immikkut angorusutatik sukkanerusumik angusinnaagaat, Inunnguaq Petrussen isumaqarpoq. Taamaaliornerli partiinut minnernut pitsaassanngilaq.


- Taamatut inatsisartuni amerlanerussuteqangaatsiarlutik, 70 procentinik taasisitsisaleraangamik, imaalissapput: Ikinnerussuteqartut illuatungiliuuttut oqaaseqarsinnaanerat annikitsuaraararsuanngussaaq, Inunnguaq Petrussen oqarpoq.