Aaja Chemnitz Larsen: Politikkikkut ikioqatigiikkusunnginneq meeqqanik eqquivoq
Nunatsinni ajornartorsiutit pillugit kalaallit politikerii Danmarkimik suleqatigiinnissamik aallartitsinngikkunik Folketingimut maanna ilaasortaq, Aaja Chemnitz Larsen aallartitsissaaq.
Aaja Chemnitz Larsen Kommuneqarfik Sermersuup illoqarfiisa ilaanni Tasiilami inuiaqatigiinni atugarliorneq pillugu DR-ip piviusulersaarutaata ”Byen hvor børn forsvinder”-ip aallakaatinneqarnerata aqaguani taama nalunaaruteqarpoq.
- Isiginnaarakku allatulli attortissimaqaanga. Arlaannik iliuuseqartariaqarlunga siullertut misigisimavunga, Nunatsinni taama misigisimasut amerlanissaat ilimagaara, politikeri oqarpoq.
AAMMA ATUARUK Kommuneqarfik Sermersooq Tasiilami pissutsit pillugit nassueruteqartoq
Ajornartorsiutilli nutaajunngillat. Nunatsinni inuiaqatigiinni ajornartorsiutaangaatsiartut qanoq iliuuseqarfigineqarnissaat Danmarkilu akisussaaffimmik tigoriikkatsinnik tigusissanersoq 2015-imili oqallisigineqalerpoq.
Isumaginninnermik susassaqarfiup tigunissaa Folketingimi amerlanerussuteqartut 2016-imi itigartitsissutigaat. Danskilli politikerii kalaallit politikeriinit ikiorneqarnissamik qinnuigineqarunik ikiuukkusullutik ataasiaannaratik oqaatigaat, tamannalu suliani ataasiakkaani kisimi pisimavoq.
AAMMA ATUARUK Folketingemi amerlanerussuteqartut Nunatta akisussaaffii ataqqivaat
AAMMA ATUARUK Danmark meeqqat atugarliortut ikiorsiivigineqarneranni ikiuukkusuppoq
Nunatsinni meeqqanut inuusuttunullu atugarliortunut ukiunut sisamanut 10 millionit koruuninik 2017-imi immikkoortitsisoqarmat, susassaqarfik tigoreersimasarput utertinneqarnersoq taamani oqallisigineqalereertoq Aaja Chemnitz Larsenip ilaatigut oqaluttuaraa.
Kikkulli suna suliarissaneraat apeqqutaasussaanngitsoq, Aaja Chemnitz Larsen isumaqarpoq.
- Suliaq kikkut ajornartorsiummik aaqqiiniarnissamut suleqataanissaannik eqqartuinermit pingaarnerusoq isumaqarpunga. Taamaaliunngikkutta suleqateqarusukkunnaaruttalu meeqqat eqqorneqaannassapput.
Kisianni Tasiilami illoqarfinnilu allani meeqqanik ikioqatigiilluni ikiuinissamik oqarneq ilumut suleqatigiinnermik isumaqateqarnissaq ajornannginneruvoq.
- Nunatsinnit sammivilerneqanngippat Naalakkersuisut, Inatsisartut, Kommuneqarfik Sermersuup Folketingillu qanoq suleqatigiissinnaanerannut sammivileerusuppunga, Aaja Chemnitz Larsen oqarpoq.
Taassuma katsorsaanissamik neqerooruteqartoqarsinnaaniassammat kommunit tamarmik meeqqanut illoqarnissaat, politiit pinaveersaartitsinermik suliaqarnerunissaat Dansk Folkepartimiillu sapaatip akunnerani matumani siunnersuutigineqartutut, tassalu meeqqat kinguaassiuutitigut atornerlunneqartut peersittarnagit kinguaassiuutitigut atornerluisut peersinneqartarnissaat kissaatigai.
