Kommuneqarfik Sermersooq Tasiilami pissutsit pillugit nassueruteqartoq
Meeqqanilli sullissineq pitsanngortinniarlugu assigiinngitsunik iliuuseqarsimallutik, Kommuneqarfik Sermersuumi borgmesterip tullersortaata Randi Vestergaard Evaldsenip oqaatigaa.
- Nassuerutigissavarput tassa ilaatigut ajornartorsiuteqaratta assigiinngitsunik, aammalu nassuerutigiinnassavarput amerlasuutigut sullissinermi aamma ajoraluartumik sumiginnaasoqarsimammat. Kisianni oqaatigerusuppara aamma soorunalimi soqutiginngitsuusaanngilagut, iliuuseqarput aamma kommunalbestyrelseminngaanniit annertoorujussuarnik aningaasaliisoqarnikuuvoq aaqqiissutissanillu ujartuisoqarluni.
AAMMA ATUARUK Tasiilaq: Atsiornernik katersisoqaraluartoq isumaginninnikkut siuariartoqanngitsoq
Randi Vestergaard Evaldsenip oqarnera naapertorlugu sulissutigineqartut suli ullumikkut malunniussimanngillat, siunissamili malugineqarsinnaalernissaat taassuma neriuutigaa.
Piviusulersaarusiami ilaatigut Naasunnguaq Ignatiussen Streymoy atsiornernik katersisoq malinnaaavigineqarpoq. Taanna Kommuneqarfik Sermersuumi politikerinut tunniussassanik atsiornernik 300-t sinnilinnik siorna novembarimi katersivoq.
Iliuuseqartoqannginnera erloqissutigineqarpoq
Taanna ippassaq KNR-imut nalunaaruteqarpoq, atsiornernik katersisimanini suli ullumikkumut qisuariarfigineqarsimanngitsoq.
- Illoqarfitsinni ajornartorsiutit unammillernarsinnaasut iliuuseqarfigineqannginnerat ataqqinninnginnertut isigaara, taanna allappoq.
Tamannali borgmesterip tullianit ima qisuariarfigineqarpoq.
- Uggornartorujussuuvoq taamannak misigisoqarnera, aamma ataqqisorujussuuagut atsiornernik atsiornerit uku tigusagut. Aamma isiginngitsuusaarnavianngilagut ajornartorsiutaasut. Nassuerutigivarput aamma ajornartorsiuteqartoq, kisianni tassa aaqqiissutissat suulluuniit tikilluaqquagut, taamatuttaaq taama oqareerlunga inuiaqatigiit akisussaaffik una tigusariaqarparput tamattaalluta. Politikerit uagut kisitta ajornartorsiut aaqqissinnaanngilarput.
KNR-imit borgmesteri Asii Chemnitz Narup pisoq pillugu apersorusussimagaluarparput taassumali feriarnera pissutigalugu apersorsinnaasimanngilarput.
