Politikki pillugu aviisimi aaqqissuisoq: Corona pillugu ingerlanerliorneq

Naalakkersuisut corona pillugu suliaat isornartorsiorneqangaatsiarpoq. Kingullertigullu Inatsisartuni illuatungiliuttut ataatsimoorlutik anersaarulupput.

Taakkua naalakkersuisunit oqallinnermut aalajangigassanullu akuutinneqartannginnerarlutik isornartorsiuillutik, Naalakkersuisullumi akunnattoorfimmiileriartortut Sermitsiap politikkimut tunngasuni aaqqissuisua, Jensine Berthelsen isumaqarpoq.

AAMMA ATUARUK Corona pillugu suleqatigiilluartoqanngitsoq – Soorlu qarmaq oqaluullugu

- Partiit akunnerminni suleqatigiinnginnerat pissutaalluni, innuttaasut illersorneqartussaapput. Corona qalipaateqanngilaq, Jensine Berthelsen oqarpoq.

Isornartorsiuisunilu kisimiinngillat. Utoqqaat peqatigiiffii, timersoqatigiit peqatigiiffii, kulturikkut peqatigiiffiit, sulisullu peqatigiiffii tamarmik isornartorsiuipput. Ilaatigut oqallinnermut peqataatinneqannginneq, malittarisassanut paatsuunganeq attaveqatigiinnerullu pitsaannginnera tunngaviupput.

Corona pileqqaarmat naalakkersuisut iluminni attaveqartarnerat pitsaasoq, piffissalli ingerlanerani pitsaajunnaariartortoq Jensinep ilanngullugu oqaatigaa.

- Massakkorluinnaq isumaqarpunga Naalakkersuisut aammalu illuatungiliuttut akisussaaffimmik tigusisariaqalersut innuttaasunullu erseqqissumik suleqatigiinnermik takutitsillutik, Jensine Berthelsen oqarpoq.

AAMMA ATUARUK Illuatungiliuttut ataatsimoorlutik Naalakkersuisut isornartorsiorpaat: Coronap akiorniarneranut ataqatigiittoqanngilaq

Tusagassiortunik aggersaasarnerit akuttoraluttuinnarput, coronali pillugu malittarisassat nutaanik suli takkussuuttoqarpoq.

Tusagassiortunik kingullermik juulip 31-iani aggersaasoqarpoq, nalunaarullu tassani saqqummiussaq isornartorsiorneqaqaaaq.

Kim Kielsen naalaakkersuisullu allat KNR-imut aggustip pingajuanili Coronavirusimut tunngatillugu isornartorsiuinernut oqaaseqartitsiniartaraluarpoq, kinguneqanngitsumili.

Ilanngutassiamut matumunnga oqaseqartiniaraluarparput, aammali iluatsitsinata.