Corona pillugu malittarisassat paatsuungassutigineqartut: Allat aamma ersarissaaqqusisut

Utoqqaat kattuffianneersut 14-it Sisimiunut tikereersut ataatsimeersuarnissaq taamaatippoq. Corona pillugu malittarisassat ersarissarneqartariaqartut aaqqissuussisartut arlallit oqariartuutigaat.
Taseralik, Katuaq, Sulisitsisut, Nunatsinni Nipilersortartut Kattuffia, Kalaallit Atuakkiortut Peqatigiiffiallu KNR-ip coronamut malittarisassat pillugit oqaloqatigereerpai. Assi © : KNR
Allattoq Malik Brøns
aggustip 12-at 2020 13:51

Siullermik arsaattartut kattuffiata KAK-p nunatsinni isikkamik arsaallutik pissartanngorniunnissat ilungersuutigigaluarpai, taamaatsinneqarpulli.

Aamma Kalaallit Nunaanni Timersoqatigiit Kattuffiata, GIF-ip timersuutini allani pissartanngorniunnissat ilungersuutigigaluarpai, tamakkuali taamaatinneqartut Naalakkersuisut tusagassiortunik katersortitsinerminni TV-kkut aallakaatinneqartumi nalunaarutigaat.

Kulturilerisut akissutissarsiortunut maannakkut ilanngupput.

Katersuuteqqusaannginnerup januaarip 31-ianut sivitsorneqarnerani inassutaavoq illup iluani inuit amerlannerpaamik 100-uusassasut, silamilu inuit 250-it. Namminerlu kommunerisap avataaniit kommunimut allamut tusarnaariarneq inerteqqutaavoq.

 

AAMMA ATUARUK Illuatungiliuttut ataatsimoorlutik Naalakkersuisut isornartorsiorpaat: Coronap akiorniarneranut ataqatigiittoqanngilaq

 

Katersuunnissamut malittarisassat

Inuit amerlanerpaamik 100-it januarip ulluisa 31-ata tungaanut illup iluani katersuussinnaapput. 

Silami inuit amerlanerpaamik 250-it katersuussinnaapput.

Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:

"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa." 

Kommunit killeqarfii akimorlugit aaqqissuusinernut pisussanullu peqataanissamut nalunaarfiusariaqartuni katersuunnissat inerteqqutaapput.

Taseralik, Katuaq, Sulisitsisut, Nunatsinni Nipilersortartut Kattuffia, Kalaallit Atuakkiortut Peqatigiiffiallu KNR-ip oqaloqatigereerpai.

Naalakkersuisunullu illuatungiliuttut maannakkut akulerupput. Taakkua tamarmik corona pillugu malittarisassat allanngortinneqarnissaannik kissaateqarput.

Kattuffik Utoqqaat Nipaat

Nunatsinni utoqqaat kattuffianni, Utoqqaat Nipaanni, sinniisut Sisimiuni ukioq manna ataatsimeersuariartussaagaluarput. Coronali pillugu malittarisassat taamaaliornisamut taamaatitsiput.

Tassami corona pillugu maleruaqqusaasunik sivitsuiniarluni, kiisalu kommunit killeqarfii akimorlugit katersuunnissat unitseqqullugit, naalakkersuisut siulittaasuat Kim Kielsen (S) ataatsimeersuarnissaq ullormik ataatsimik sioqqullugu tv-ikkut nalunaaruteqarpoq.

AAMMA ATUARUK Nipilersortartut nilliapput: Malittarisassat ersarinnerusariaqarput

Taamalu aalajangerneq ataatsimeersuarnissamut peqataasussanut pakatsinarpoq.

- Uggornaraluarpoq, ataatsimeersuarnermi tamaat piareersarnikuuarput, Sisimiunullu peqataajartorlutik apuuttut pakatsisimaqaat, Karl Berthelsen oqarpoq.

Tassami ataatsimeersuariartut 14-it Naalakkersuisut katersuunnissamut killilersuinermik sivitsuisinnagit Sisimiuniilereersimapput. Taakku ilaatigut Upernavimmeersunik Nanortalimmeersunillu ilaqarput.

Siulersuisut ataatsimeersuarnissamut corona pillugu allattoqarfik suleqatigalugu qaammatinni kigullerni sisamani pilersaarusioraluarput.

Naalli utoqqaat ataatsimeersuarnissamik taamaatitinneqarnera pakatsissutigigaluarlugu, aalajangerneq akuersaartariaqarpaat.

- Utoqqalereernikunummi coronavirusi uloriarnarpoq, eqimattakkaanimmi ulorianartorsiortunut ilaavugut, Karl Berthelsen oqarpoq.

Eqqumiitsuliortut Peqatigiiffiat: Malittarisassat uuminartut

Eqqumiitsuliortut peqatigiiffiat, EPI, katersuunnissamut kommunillu killeqarfii akimorlugit angalasinnaanermut killilersuinermut qatsussivoq.

- Isiginnaartitsisartut namminersortut Nunatta Isiginnaartitsisarfialu corona pillugu maleruaqqusanit uuminartunit eqqugaaqqapput. Nunatsinni coronavirusimit napparsimasoqanngilaq. Nunatta iluani iloqarfinni assigiinngitsuni innuttaasunut isiginnaartitsiartorluta angalaqqusaannginnerput eqqumiippoq.

AAMMA ATUARUK Frederik Elsner Ole K-lu coronamut malittarisassaqaraluartoq tusarnaartitsiartoqattaalersut: Akuerisaanikuuvugut

EPI-p siulittaasua Naleraq Eugenius taama oqarpoq.

Naalakkersuisut maleruaqqussutitik kulturimut tunngasut allanngortissagaat aamma kissaatigaa.

- Isiginnaartitsisartut aningaasarsiornissaat innarlerneqarpoq, angalallutimmi isiginnaartitsisarnermi akissarsiortaramik. Corona pillugu malittarisassat oqaloqatigiissutigisariaqarpagut, EPI-p siulitaasua oqarpoq.