Nipilersortartut nilliapput: Malittarisassat ersarinnerusariaqarput
- Meeqqat atuarfii killilersugaanngimmata atuartut atualilerput. Politikkerit ataatsimoorsinnaapput, tamaattoq nipilersortartut ataatsimooqqusaanngillat. Arlaannik equngasoqarpoq.
Nunatsinni Nipilersortartut Kattuffiani siulittaasoq Georg Olsen taamannak oqarpoq.
AAMMA ATUARUK Katuaq corona pillugu malittarisassat pillugit: Susinnaanerluta paasisinnaanngilarput
Nunarput avammut angallavinngorluni juunip 15-iani ammarpoq, timmisartumi sapaatip akunneranut 600-t tikillugit ilaasoqarsinnaanngorluni. Nunatsinnullu angalaniartut qassiunissaat juulip 21-iani apeqqutaajunnaarpoq.
Angallannerup ammaqqinneqarnera timmisartortitseqatigiiffimmut Air Greenlandimut, Namminersorlutik Oqartussanik pigineqartumut, takornarialerisunullu anigaasatigut iluaqutaavoq.
Ammaanerli nipilersortartunut iluaqutaanngilaq.
Taakkualu nunarput tikinniartunut ammarneqartoq nunatsinni aaqqiisuussinissanut sooq killilersuisoqarnersoq paasisinnaanngilaat.
Killilersuineq sukangavallaartoq
Nipilersortartut kattuffiat aatsaat nillialinngilaq. Tassami nipilersortartutut inuuniuteqartut, aningaasaqarnikkut eqqugaasut, taamani siulittaasuusimasoq, Inunnguaq Petrussen, martsimi siullermeerluni oqariartuuteqarpoq.
Nipilersortartummi allatulli ineqarnermut nerisassanullu akiligassaqartarput, tusarnaartitsinerminniillu tamakkununnga akissaqalerparput.
Siulittaasunngorlaaq manna oqariartuuteqaqqippoq, pisortanit aalajangiussanut akuutinneqarnerulernissamik kissaateqarlutik.
- Soorunalimi killilersuinerit paasisinnaavagut, avaqqunneqarsinnaanngillat. Kisianni nunatsinni eqqumiitsuliortut, nipilersortartut isiginnaartitsisartullu, inuiaqatigiinnut anersaakkut tunisisartut, killilersorneqarpallaarujussuarput.
Ukioq manna aaqqissuussat assigiinngitsut taamatsiinnarneqartut ilaat makkuupput: Qeqertarsuaq Festival , Ilulissani Qaleralik Festival, Aasianni Nipiaa Rock- Festival kiisalu Nuummi Akisuanerit Festival. Taamaatsinneqarnerilu kattuffiup uggoraa:
- Nipilersortartunut akisoorujussuuvoq aamma uggornarpoq tusarnaariartussarpassuit tusarnaariarsinnaajunnaarnerat, Georg Olsen oqarpoq.
Nangillunilu oqaatigaa naammagisimaarinninnatik, aalajangiussallu imminnut ataqatigiinngittut ersernerlullutillu. Kisiartaanatillu inassutit pillugit peqqussutik ersernerlunnerannik isumaqartut.
- Taamaamat tunuarsimaannarusunngilagut, ataatsimuguna ammasumik oqaluuserineqartariaqartut.
Billetsinik tunisakippallaaraanni akilersinnaanngillat
Katersuuteqqusaannginnerup januaarip 31-ianut sivitsorneqarnerani inassutaavoq illup iluani inuit amerlannerpaamik 100-uussasut, silamilu inuit 250-it. Namminerlu kommunerisap avataaniit kommunimut allamut tusarnaariarneq inerteqqutaavoq. Nipilersortartut kattuffianit tamanna inatsisit sukangagineqarput.
Katersuunnissamut malittarisassat
Inuit amerlanerpaamik 100-it januarip ulluisa 31-ata tungaanut illup iluani katersuussinnaapput.
Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
- Aaqqissuusisussat tusarnaariartussanut inunnut 100-inut imaluunniit 250-inut anigaasartuuteqarusukkunnanngillat, imminummi akilersinnaanngilaq. Aaqqissuusisussat aaqqissuuserusukkunnanngillat.
Taamaattoq Frederik Elsner aamma Ole Kristiansen sinerissami angalapput, kommunit assigiinngitsut tikittarlugit. Tusarnaariarsinnaasulli amerlassusaannik inassutaasut eqquutsillugit aaqqissuusipput.
Nipilersortartut Kattuffianni siulittaasup Frederik Olelu nipilersorniarlutik angalasinnaanerat piviusunngorsimammat nuannarutigaa. Nipilersoqatigiilli tamarmik taamannak periarfissaqanngillat. Nipilersoqatigeeqarpormi arlalinnik ilaasortaqartunik, taakkulu periarfissaqanngillat.
AAMMA ATUARUK Frederik Elsner Ole K-lu coronamut malittarisassaqaraluartoq tusarnaartitsiartoqattaalersut: Akuerisaanikuuvugut
- Nipilersortartut allat tunniutiinnaqqunagit, tusarnaartitseqqissinnaalernissap tungaanut sorsoqqullugit kajumissaarerusuppunga.
