Frederik Elsner Ole K-lu coronamut malittarisassaqaraluartoq tusarnaartitsiartoqattaalersut: Akuerisaanikuuvugut

Frederik Elsner Ole Kristiansenilu sinerissamut angalallutik marlunngormat aallartipput. Naak kommunimit kommunimut angalalluni aaqqissuussinernut peqataasoqaqqusaanngikkaluartoq tusarnaartitsiartoqattaalerput.
Frederik Elsner Ole Kristiansenilu Akunnaami, Aasianni, Ilulissani, Sisimiuni naggataatigullu Nuummi tusarnaartitsissapput. Assi © : Privatfoto: Frederik Elsner
Allattoq Malik Brøns
aggustip 09-at 2020 10:50

Nunatsinni ukioq manna pissartanngorniuuttoqassanngilaq.

Atuakkiortut peqatigiiffiat ataatsimeersuartitserusukkaluarluni tamanna taamaatiinnarneqarpoq.

Kingullermik Sulisitsisut corona pillugu Naalakkersuisut malittarisassiaat isornartorsiorneqarput: Kommunimiimmi kommunimut allamut angalalluni aaqqissuussinernut isumasioqatigiinnernulluunniit peqataajartortoqaqqusaannginnera akunnittarfiit neriniartarfiillu akiliisinnaajunnaarnerannik kinguneqarsinnaavoq.

Kommunimiilli kommunimut allamut angalalluni ataatsimiinnerni, isumasioqatigiinnerni aaqqissuussinernili peqataasoqarsinnaavoq: taakkulu politikeriupput.

AAMMA ATUARUK Múte B. Egede: Hvis vi politikere må samles, bør andre også have lov

Aammali allanik akuerisaasoqarpoq: Tassa nipilersortartut marluk Ole Kristiansen aamma Frederik Elsner. Taakku illoqarfimmiit nunaqarfimmut, nunaqarfimmiillu illoqarfimmut kommunit assigiinngitsut tikittarlugit angalanissaminnut akuerineqarput.

Frederik Elsner nuuteeralioqqammerpoq, tusarnaartitsisartoqattaarnerminilu Ole Kristiansen tusarnaartitseqatigissallugu.

Corona pillugu allattoqarfimmit akuerineqartut

Tamanna Frederik Elsnerip nuannaarutigaa.

Katersuunnissamut malittarisassat

Inuit amerlanerpaamik 100-it januarip ulluisa 31-ata tungaanut illup iluani katersuussinnaapput. 

Silami inuit amerlanerpaamik 250-it katersuussinnaapput.

Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:

"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa." 

Nipilersortartutummi inuuniuteqarneq corona pillugu killilersuisoqarnerani ajornaatsuinnaanngilaq.

- Nipilersoqartigiilluni eqimattatut angalanissamut pisortat inassutaat eqquutinniarlugit ajornartorujussuuvoq, assersuutigalugu Ole Kristiansenilu kisitta angalavugut, nipilersoqatigisartakkagut allat angalaqatigilinngilagut, Frederik Elsner oqarpoq.

Coronami pillugu allattoqarfiup tusarnaartitsiartoqattaarnissaat nipilersortartut aatsaat nipilersortuminnik ilagisaqanngippata akuerisinnaasimavaa.

- Amerlanerugutta kommunimiillu allamik amerlavallaarutta pisortat peqqussutaannik unioqqutitsissalluta paasitinneqarpugut. Olelu marluinnaaniaratta akuerisaavugut, nipilersortartoq oqarpoq.

Tusarnaariat amerlavallaassanngitsut

Ulloq taanna KNR-ip Frederik Elsner oqaloqatigigamiuk nunaqarfimmi Ikamiuni tusarnaartitsisussaavoq. Nunaqarfimmi innuttaasut 80-it missaanniipput, nunaqarfimminngaanneersullu kisimik peqataassallutik.

Elsnerip angalanissaminni aaqqissuussat akisussaasuseqarluartumik ingerlanneqarumaartut upperaa.

- Iluatsimmata nuannaaqaanga. Aaqqissusisut akisussaassuseqartumik qanoq aaqqissusissallutik nalunngilluaraat, coronavirusimullu tunngatillugit piumasaqaatit taamaasa ilisimaqqissaaraat malungisinnaavara, Frederik Elsner oqarpoq.

Frederik Elsner Ole Kristiansenilu Akunnaami, Aasianni, Ilulissani, Sisimiuni naggataatigullu Nuummi tusarnaartitsissapput.

Sisimiut – Frederiup Olellu tikinnissaannut piareersimavugut

Sisimiuni kulturip illorsuani Taseralimmi Frederiup Olellu aggustip ulluisa 8-aanni appinissaat qilanaarutigineqarpoq.

Kulturip illorsuani sulisut corona pillugu malittarisassat eqqortinniarlugit Naalakkersuisut nalunaarutaat atuaqattaarsimavaat.

- Sisimiuni innuttaasunut kisimi aaqqissuussineruvoq. Aaqqissuussinermi kommuninit allanit peqataasoqartinniarlugu ussassaarutiginngilarput, tusarnaartitsinermullu inuit 100-t kisimik takkussinnaapput, Taseralimmi paasissutissiinermut suliniutinut ataqatigiissaarisoq, Nuka Alice Lund oqarpoq.

AAMMA ATUARUK Timersoqatigiit kattuffiat pissartanngorniuttoqarnissaanut kimigiiseqataalersoq

- Assersuutigalugu tusarnaartitsinermut tusarnaariaqatigiit pingasuuppata, taava issiaaviit eqqaanniittut marluk inoqassanngillat.

Taassuma tusarnaartitsinissaq nammangittaalliornertaqanngitsumik naammassineqarumaartoq upperilluinnarpaa.

- Soorunami tamatta coronavirus pillugu ernumavugut. Ilisimavarpulli nunatsinni nappaammik tunillaasuunneq atugaanngitsoq. Taamaammat isumalluarpunga nalunagulu Frederik Elsner aamma Ole Kristiansen nipilersortartuusut suliaminnut misilittagaqartut. Taseraliup iluani bakteerianut toqoraatinik (spritinik), assanullu asattuivinnik atoriaannarnik peqarpugut. Inassutit maleruaqqusaasut malippavut, Nuka Alice Lund oqarpoq.

Corona pillugu allattoqarfik: Taamaammat akuerineqarput

Corona pillugu allattoqarfiup nipilersortartut nunatsinni tusarnaartitsiartoqarnissaanut akuersisuuvoq.

- Aaqqissuussinerup immikkuualuttortai tamarmik ilisimanngilagut, kisianni aaqqissuussinernut atatillugu killiliussat malissagaat nalilerparput, attaveqaqatigiinnermut akisussaasoq, Emil Stach KNR-imut mailikkut allappoq.

- Tassunga atatillugu inaarutaasumik aalajangiinerit maani aalajangerneqarneq ajortut imaluunniit aalajangerneqarsinnaanngitsut, tamannalu aaqqissuussisut ataasiakkaat malittarisassanik atuuttunik malinninnissaaniittoq  erseqqissassallugu pingaaruteqarpoq

AAMMA ATUARUK Politikerit katersuussinnaapput: Kalaallimmi atuakkiortut katersuussinnaappat?

- Nalunaarut naapertorlugu aaqqissuussinerni kommuninit allanit peqataajartortoqaqqusaanngilaq, nipilersortartorlu tusarnaartitsisoqarnerani tunngaviusumik peqataajartortuunngilaq.

- Nipilersortartorli peqataasut akornanni peqataaleruni imaluunniit allatigut apeqquserneqarsinnaaguni peqataasutut apeqquserneqaratarsinnaavoq. Malittarisassanillu unioqqutitsisoqarnerani tamanna naggaterpiaani politiinut eqqartuussiveqarfinnullu suliassanngortinneqarsinnaalluni.

KNR-ip naalakkersuisut ulluni qassiiusuni oqaaseqartinniaraluarpai. Kommuninit kommuninut aaqqissuussinernut inuit ilaat akuerineqarsinnaappata sooq allat akuerineqarsinnaannginnerat KNR-imit apeqqutigerusukkaluarparput - akissutersinngilagulli.