Múte B. Egede: Politikerit periarfissaqarpata timersortartut kulturilerisullu periarfissaqartariaqarput
- Timersornermut kulturikkullu aaqqissuussanut, soorunami peqqinnissaq qitiutillugu aamma ammasariaqaraluarpoq, Inuit Ataqatigiit siulittaasuat, Múte B. Egede oqarpoq.
AAMMA ATUARUK Politikerit katersuussinnaapput: Kalaallimmi atuakkiortut katersuussinnaappat?
Corona pillugu malittarisassat maanna atuuttut qaammammik ataatsimik sivitsoqqinneqartut, Naalakkersuisut siulittaasuata, Kim Kielsenip tallimanngormat oqaatigaa.
Tassalu nunatsinni assersuutigalugu arsaanermik, sulorarnermik volleyballernermilu ukioq manna pissartanngorniutivittoqarsinnaajunnaarpoq.
Inuit amerlanerpaamik 100-it januarip ulluisa 31-ata tungaanut illup iluani katersuussinnaapput.
Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
Politikerit katersuussinnaasut
Katersuussinnaanermulli maleruaqqusat politikerinut atuutsinngitsut nalunaarusiami allaqqavoq.
Siumumi ilaasortat taamaalillutik nuna tamakkerlugu Ilulissani septembarimi pisussamik ataatsimeersuarsinnaalerput.
Politikerinut periarfissaappat innuttaasunut allanut aamma periarfissaasariaqartoq, Múte B. Egede isumaqarpoq.
- Soorunami paaraluni, aamma timersortartut paaralutik kulturilerisullu paaralutik aaqqissuussinerit ingerlakkusukkaat taakkua ammaffigineqartariaqartut. Nalunaarummimi politikikkut isummersornermullu tunngasut ingerlatinneqarsinnaanissaat ammatinneqarmata, Múte B. Egede oqarpoq .
Naalakkersuisut nunatta avammut ammaqqinnissaanut pingaarnersiuinerat allaanerusinnaasoq, Inuit ataqatigiit siulittaasuat isumaqarpoq.
AAMMA ATUARUK Kim Kielsen: Ukioq manna pissartanngorniuttoqassanngilaq
- Inuit Ataqatigiinninngaaniit isumaqarpugut nunatta avataanut toqqaannavik ammavilluni ingerlatseqqaarani, nunatta iluani kulturikkut timersornikkullu aaqqissuussanut periarfissanut annerusunut tunniusseqqaartariaqartugut.
Naalakkersuisut inuit peqqissusaasa maleruaqqusaliornermi salliutinneqarnissaat tunngavilersuutigaat.
Nunatsinni timersornikkut kulturikkullu aaqqissuussinerit ammaanneqarnerusariaqaraluartut, Múte B. Egede isumaqarpoq.
- Inuit peqqissusaat soorunami qitiussaaq. Aamma isumaqarpunga aaqqiissutissanik nassaartoqarsinnaasoq, peqqinnissaq aaqqissuussinerillu ataatsimut ingerlaqatigiisissinnaanerat periarfissaareerpoq, tamanna nunat sanilitta ingerlakkaat aamma takuneqarsinnaavoq.
Naalakkersuisut siulittaasuat, Kim Kielsen tassunga tunngatillugu KNR-imiit oqaaseqartinniarsaraarput.