SIK ataatsimeersuarnissanut aningaasartuutinut taarsiiffigeqqusoq
Suut politikimut attuumassuteqanngillat?
SIK-p septembarimi ataatsimeersuarnissaralua, coronap allattoqarfianiit itigartitsissutigineqarmat, Siumullu nuna tamakkerlugu ataatsimeersuarsinnaatitaalluni, tamanna SIK-p siulittaasuata apeqqusernartoqartippaa.
- Imaappa Siumuugaanni immaqaluunniit politikikkut qinigaagaanni taava coronamik tunillatsittoqarsinnaanngitsoq? Immaqaluunniit tunillaasoqarsinnaanngitsoq? Taamatut maleruagassalioraanni taava kikkunnut tamanut atuuttariaqarput,
SIK-p siulittaasuat, Jess G. Berthelsen oqarpoq.
- Paatsiveerunnersaarsuaqassaaq
Kalaallit Nunaata soraarnerussutisiaqalernissamut aningaasaateqarfiat SISA Ilulissani aggustip 26-ani 15-init peqataaffigineqartumik ataatsimiititsisussaagaluarpoq, septembarillu 15-iani SIK ataatsimeersuartussaagaluarluni.
Nalunaarusiarli nutaaq aggustip aappaani atuutilermat SIK-p ataatsimeersuarnissaa Jess G. Berthelsenimit nalornissutigineqaæerpoq.
Aaqqissuussammi kommunimiit kommunimut inunnit peqataaffigineqarsinnaasut inerteqqutaalerput.
SIK ataatsimeersuarsinnaanani coronap allattoqarfianiit aggustip sisamaani ilisimatinneqartoq, siulittaasoq oqarpoq.
Akerlianillu Siumukkormiut nuna tamakkerlugu Ilulissani septembarip sisamaaniit arferngat ilanngullugu inunnit ikinnerpaamik 68-init peqataaffigineqartussaq ingerlanneqarsinnaasoq Jess G. Berthelsenip paasigamiuk kamaatigaa.
- Kisianni Siumut ataatsimeersuartussaammat taava ilissi ingerlassinnaavarsi. Taamatut ingerlatsisoqarniarpat nunami maani, taava paatsiveerunnersuaqassaaq, SIK-p siulittaasuat, Jess G. Berthelsen taama oqarpoq.
Taarsiiffigeqquniarput
Naalakkersuinikkut allatulluunniit isummernikkut siunertalinnut atuutinngitsoq nalunaarusiami allaqqavoq, taamaammallu Siumup ataatsimeersuarnissaa unioqqutitsinerunani.
Jess G. Berthelsenilli oqarnera naapertorlugu SIK SISA-llu ataatsimeersuarnissaat politikikkut attuumassuteqarluinnarmat, coronap allattoqarfiata itigartitsinera paasisinnaanngilluinnarpaa.
Taamaammat ataatsimeersuarnissamut suna peqqutigalugu itigartitaasimanertik paasiniarniarlugu SIK-p siulittaasuata coronap allattoqarfianut paasiniaqqippaa.
SIK-p SISA-llu suna pillugu ataatsimeersuarsinnaannginnerat allattoqarfiup misissuleruttorpaa, allattoqarfillu siusinerusukkut akissutimi assinganik akissuteqassappat, Siumullu nuna tamakkerlugu ataatsimeersuarnissaa siunertaaginnassappat, kattuffiup taarsiiffigineqarnissani piumasaqaatiginiarpaa.
- Massakkut annertungaatsiartumik aningaasartuuteqarsimavugut. Billetit utertinneqarsinnaanngitsut, piffissaq annertuut atorsimasarput piareersarlugu, taannalu minnerpaamik 150.000 koruunit missaannik naleqarpoq.