Corona pillugu suleqatigiilluartoqanngitsoq – Soorlu qarmaq oqaluullugu
Coronap ilungersunartorsiortitsinerata qaangerniarnerani politikkikkut suleqatigiittoqanngilaq, Naalakkersuisullu illuatungiliuttut siunnersuutaannut tusaanianngillat.
Illuatungiliuttut partiit siulittaasuisa partiit ataatsimut katersuullutik coronap ilungersunartorsiortitsinerani aaqqiissutissat pillugit ataatsimiinneranni tusaaneqartannginnerminnik qatsussisut taama isornartorsiuipput.
- Allatut siunnersuuteqaraangatta anersaaruluttoqaannanngikkaangami sikimiinnartoqartarpoq, ingerlallutillu. Oqallittoqarneq ajorpoq, allaaneq ajorpoq qarmamik oqaloqateqarluni, Suleqatigiissitsisut siulittaasuat, Tillie Martinussen oqarpoq.
AAMMA ATUARUK Illuatungiliuttut ataatsimoorlutik Naalakkersuisut isornartorsiorpaat: Coronap akiorniarneranut ataqatigiittoqanngilaq
Tamatuma saniatigut Kim Kielsenip nuna tamakkerlugu tusagassiortunik katersortitsinissaanut akunneq affaannanngortoq akunniinnanngortorluunniit ataatsimiittoqarajunneruvoq, taamaammat suliniutit nutaat pillugit oqallinnissamut piffissaqarneq ajorpoq.
Inuit amerlanerpaamik 100-it januarip ulluisa 31-ata tungaanut illup iluani katersuussinnaapput.
Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
Tamanna nunatta killeqarfiisa ammaqqinnissaanut assersuutigalugu pivoq.
- Angallannermut tunngasut taakku sioqqutsisumik (saqqummersinneqarnissaannut aaqq.) piffissaq sivikitsuarakasik atorlugu apuunneqarput ammaasoqalersoq. Taava soorunami ilagut allatut isummersoraluartut taakku tusaaneqaratik taamatut ingerlasaqattaaginnarpugut, Partii Naleqqap siulittaasua, Hans Enoksen oqarpoq.
Coronaviruseqartoqarneranili piffissat tamaat tamaattoqanngilaq.
- Aallaqqaammut tusarnaartoqartarlunilu oqallittoqartarpoq, taamaattoqartarunnaavipporli, Tillie Martinussen oqarpoq.
Tamanna Inuit Ataqatigiit, Partii Naleqqap, Atassutip Suleqatigiissitsisullu qatsuppaat, partiimmi coroanvirusimut tunngasut qanoq iliuuseqarfiusinnaanerannut siunnersuutitsialappassuaqarlutik isumaqarput.
AAMMA ATUARUK Kim Kielsen: Ukioq manna pissartanngorniuttoqassanngilaq
Illuatungiliuttut partiivisa nunatta avammut ammarnera nunattalu iluani killilersuinerpassuaqarnera pingaartumik isornartorsiorpaat.
- Politikikkut sammisanik katersuuttoqarsinnaavoq illuatungaanilu kulturilerinerit timersornerillu pisinnaanatik taamaammat taakkunani ataqatigiinngitsut arlaqarput. Aamma taassuma saniatigut inuit imerniartarfinni katerissinnaapput annertuumik, kisiannili illuatungaani kulturilerinermi katerissinnaaneq killeqarluni, Inuit Ataqatigiit siulittasuat, Muté B. Egede oqarpoq.
Martinussen: Kielsenip isumaqatigiittoqarnera TV-kkut sallussutigaa
Naalli Naalakkersuisut illuatungiliuttut siunnersuutaannut tusarnaanngikkaluarlutik nalunaarutit nutaat atuutsilernissaat tunuarsimaarifiginngilaat.
Naalakkersuisut coronavirusimut tunngatillugu aqutsinermut toqqaannartumik sunniuteqartunik 24-nik marsimiilli nalunaaruteqarput.
Kim Kielsenip nalunaarutit assigiinngitsut piffissamiit piffissamut atulersinneqartartut Inatsisartuni isumaqatigiissutaasut qasseeriarluni oqaatigaa, tamannali qasseeriarluni paasiuminaanngikkuni toqqaannartumik sallunerusartoq, Tillie Martinussen oqarpoq.
- Qasseeriarujussuarluni ”partiit tamarmik aalajangiinermut tunuliaqutaasut” oqaatigisarpaa, oqaaseqatiiinnut ataatsinut isumaqataasugut oqaatigisarpaa, kisianni sinneranut isumaqataaneq ajorpugut, kisianni saqqummiussinerani sinneranut isumaqataasututut nipeqalertarpoq, Tillie Martinussen oqarpoq.