Sulisitsisut: Politikerip kukkuluttorneri Kalaallit Nunaata tatigineqarneranik innarliisut
Politikerit maligassiuisussat ileqqorlukkaangata Kalaallit Nunaanni isumaqatigiissusiortartut nunamut tatiginninnerat millisarpoq, tamannalu pitsaasuunngilaq.
Aleqa Hammondip Folketingimit kreditkorterisaminik imminut pisiortorsimanerata kingorna Sulisitsisut peqatigiiffianni, GE-mi, pisortaq, Brian Buus Pedersen taama oqarpoq.
Pisoq Kalaallit Nunaanni inuussutissarsiutinik ingerlatalinnut qanoq kinguneqassanersoq oqaatigiuminaappoq, nunalli sinniisaasa malittarisassanik unioqqutitsisarnerat pitsaasuunnglaq, pisortaq oqarpoq.
Aamma atuaruk Kim Kielsen: Aleqa Siumumit anisinneqarpoq
- Taava innuttaasut akornanni Kalaallit Nunaannullu tunngasunik suliaqartuni tatiginninneq millissaaq. Aamma taamatut pisut amerliartortillugit Kalaallit Nunaanni torersumik ingerlatsisoqannginneranik eqqarsalersitsisinnaanera pitsaasuunngilaq, pisortaq oqarpoq.
Matumanili pisumi Kalaallit Nunaanni siulersortaasut pisoq akuerinngilaat, tamannalu nunap isigineqarnerata innarlerneqannginnissaanut tunngatillugu pingaartuuvoq, Brian Buus Pedersen oqarpoq.
- Pisumi matumani Siumumit erngertumik iliuuseqartoqarpoq. Ileqqorissaarnermik pingaartitsinissamut assersuutissaavoq pitsaasoq, pisortaq oqarpoq.
Aamma atuaruk Bo Lidegaard: Aleqamut suliaq Kalaallit Nunaannut sunniuteqarnavianngitsoq
Brian Buus Pedersen naapertorlugu, kreditkortimik atuinermut kingunerluutit ilaat tassaavoq Socialdemokraatit Folketingiittuutitaannut Siumut ulluinnarni attaveqarnerminik annaasaqarnera.
Aleqa Hammondimmi parteeqatiminik taarserneqarani Folketingimi attaviitsutut ingerlaqqinnissaminik aalajangerneratigut Kalaallit Nunaata Danmarkimi sunniuteqaqataasinnaanera millivoq, pisortaq taama oqarpoq.
Aamma atuaruk Aaqqissuisuuneq: Aleqa Folketingimi ilungersortussanngorpoq
- Kalaallit Folketingimi ilaasortaatitaasa sunniuteqarluarnissaat aammalu partiinik allanik qanittumik pitsaasumillu suleqateqarnissaat kissaatigaarput. Suleqatigineqarunnaarpatami angusat assinginik angusaqarnissaq ajornarnipilussuussaaq, pisortaq naggasiivoq.
