Bo Lidegaard: Aleqamut suliaq Kalaallit Nunaannut sunniuteqarnavianngitsoq
Politikenimi aaqqissuisuusimasoq Nunarpullu pillugu ilisimasalik Bo Lidegaard taama isumaqarpoq.
Suliarli pillugu nunat allamiut Kalaallit Nunaannut isiginninnerannut kinguneqarnerlunnavianngitsoq isumaqarluni.
Siumut pingaarutilimmik iliorpoq partiip marlunngornermi Aleqa Hammond anisikkamiuk.
Oqaluttuarisaaneq pillugu ilinniagaqartoq aviisimilu Politikenimi pisortaasimasoq ukiorpassuarnilu Kalaallit Nunaat pillugu malinnaasimasoq Bo Lidegaard taama isumaqarpoq.
- Siumup ilaasortaajunnaarsikkamiuk takutippaa pisimasoq akuerineqarsinnaanngitsoq, partiimullu ilaasortaagaanni tatiginassuseqarnissamut akerliulluinnarmat.
Siumumit ilaasortaajunnaarsitaanerup kinguneranik aamma Socialdemokratinik suleqateqarneq kipitinneqarpoq.
Folketingimi attaviitsuunissaq Hammondimut aamma inuttut sunniuteqartupilussuussasoq, Bo Lidegaard isumaqarpoq.
- Folketingimiitilluni taasinerit tamarmik pingaaruteqarput - kinaluunniillu sunniuteqarsinnaajunnaareersinneqartanngilaq. Soorunalimili politikerisut sunniussinnaaneq ima pisoqartillugu sunnernerlunneqartarpoq. Aleqa Hammondillu inuttut tatiginassusaa sunnernerlunneqanngitsoornavianngilaq.
Bo Lidegaard isumaqarpoq Kalaallit Nunaannut uggornartuusoq qinikkat Nunatsinneersut aappaa Folketingimi maanna sunniuteqarsinnaajunnaartutut oqaatigineqarsinnaalermat.
Siumulli erseqqissumik iliuuseqarnera Christiansborgip avataani sunniuteqarnavianngitsoq, taanna isumaqarpoq.
- Isumaqarpunga suliaq taama ittoq Kalaallit Nunaata avataanut sunniuteqarnavianngitsoq, aamma aningaasaleerusuttunut. Taama ippoq partiia iliuuseqarmat ajornartorsiullu inummi tassaniitillugu, partip ajornartorsiutaatut pinnagu. Isumaqarpunga nunani allamiut Kalaallit Nunaannut aningaasaleerusussutaat inuussutissarsiuteqarnermi qanoq ittuunermut tunnganerusoq, Lidegaard oqarpoq.
Naak Aleqa Hammond siusinnerusukkut pisortat aningaasaataannik atornerluisimagaluartoq, Bo Lidegaardip siunissami politikikkimiiginnassanersoq isersimaannassanersorluunniit eqqoriarnianngilaa.
Tassungalu assersuutitut taavai danskit EU-parlamentimi ilaasortaatitaat Morten Messerschmidt franskillu præsidenterisimasaat Nicolas Sarkozy, taakku pisortat aningaasaataannik atornerluisismagaluarlutik taasiserpassuaqartut.
