Politiken: Kalaallit Nunaata aningaasaqarnini aaqqittariaqarpaa
Allaaserisami qulequtserneqarsimasumi "Græsk Grønland", Kalaallit Nunaat grækerisut-mik taasinnaasatsinni, oqaatigineqarpoq piaarnerpaamik aningaasarsiorfissanik malunnaatilinnillu iluarsartuusseqqittoqanngippat, Kalaallit Nunaat Grækenlanditut ileriaannaasoq.
Nunani tamalaani aningaasarsiornikkut ajornartorsiortoqalermalli, Grækenland aningaasarsiornikkut ajalusoortarpoq, EU-mullu aningaasarsiornikkut arlaleriarluni ikioqqusarluni. Naak EU-mit aningaasarpassuarnik atukkerneqartaraluarlutik grækerit politikerii neriorsuutigisamittut iluarsartuusseqqinnernik piviusunngortitsisimanngillat.
Kalaallit Nunaanni tassa aamma taama pisoqariaannaavoq - matumanili atukkiisussaq tassaalluni Danmark, pingaarnertut allaaserisami taama allapput. Taamaattumik Naalakkersuisut nutaat piaarnerpaamik sulillutik aallartittariaqarput.
- Taamaattumik Kim Kielsenip aningaasarsiornikkut siuariartoqqilernissaq anguniarlugu amerlasuunit peqataaffigineqartumik naalakkersuinikkut isumaqatigiissusiornissaq sapinngisani tamaat atorlugu anguniartariaqarpaa.
- Taamaaliornikkummi naalakkersuinikkut ingerlatsineq, namminersortunut aningaasaleerusuttunut pilerinarnerulersitsisussaq anguneqassammat. Tamannami Kalaallit Nunaata pisariaqartilluinnarpaa, allaaserisami pingaarnerutitami ilaatigut allapput.
Aviisimi allaaserisami oqaatigineqarpoq, aatsitassarsiornerup aallartinneqarnissaata utaqqinissaanut piffissaqanngitsoq. Tamatumunnga taarsiullugu inuiaqatigiinni iluarsartuusseqqinnerit kingunerinik Nunatta karsia immerneqassaaq.
