Politiit toqusoqarneranik misissuinerminnut atatillugu takunnissimasinnaasunik ujarlertut
Angut pineqartoq angerlarsimaffimmini aggustip arfineq-aappaanni kisimiittoq nassaarineqarpoq, tamatumalu kingorna Nuummut Dronning Ingridip napparsimmavissualiaanneqarluni. Napparsimmavissuarmut apuunneqarnermi kingorna ullut tallimat qaangiuttut toquvoq.
Politiillu tamatuma kingorna angummik persuttaasimasutut pasisaminnik tigusarinnissimagaluarput, kingorna iperagaasumik.
- Tassa suliaq persuttaanertut ingerlapparput, imaappoq saaffiginnittoqarnerata kingorna suliaq aallartisarneqarsimavoq persuttaanertut. Taamaalilluni aamma suli paasiniaanerit ingerlapput. Erseqqissumik suli inerniliinikuunngilagut, Qaasuitsup politiivineersoq Kasper Berthelsen taama oqarpoq.
Toqusoqarsimatillugu misissuisartut Danmarkimiit tikisinneqarsimasut aqagu tallimanngornermi misissuissapput.
Pisumut atatillugu ilisimasaqartut Ilulissani politiinut saaffiginneqquneqarput, taakkulu oqarasuaataasa normoraat 70 14 22.
