Pele Broberg: Amerikamiut soqutiginninnerat aamma periarfissaqartitsivoq

Jeff Landryp USA-p præsidentianit immikkut aallartitatut toqqarneqartup nunatta USA-mut ilanngutinnissaanik sulissuteqarnissani qilanaaraa.

Donald Trumpillu taama toqqaanera nunatsinnik pingaartitsineranik takutitsisoq, Inatsisartuni illuatungiliuttunit nunanut allanut tunngasunut ataatsimiititaliaanni ilaasortaq Pele Broberg naliliivoq.

Politikereqatini uippallinnginnissamik kaammattuuteqarfigai. Amerikamiut soqutiginninnerat aamma periarfissaqarfiusoq taanna isumaqarpoq.

- Malunnarpoq, USA-mi nunat pingaarutillit immikkut aallartitanik imaluunniit ikkussanik inunnik pilersaarusiorfigisaqattaaraat. Taamaammat imaannaanngitsorujussuarmik nunatsinnut periarfissanik tunniussinertut uanga isigivara. Inuiaat kalaallit suniarnersut paasiniarnissaannut periarfissanik pitsaanernik apuussilluni pisinnaanngornissamut, Pele Broberg oqarpoq. 

USA-p præsidentiata immikkut aallartitamik toqqaanera nunatsinni isornartorsiorneqartupilussuuvoq. Nalerarli periarfissanik ujartuerusunneruvoq, nunatsinniilli nalunaarutigineqareertoq ersarittoq oqarpoq.

- Naak Naleraq naalagaaffinngorniarluni siuttuugaluartoq, uagut kinaassuserput amerikamiunngornissamut taarserusunnginnatsigu erseqqissartariaqassavara siullerpaatut.

Nunatta USA-mut ilanngutitinniarneqarneranut ajuallattoqartarnera paasisinnaallugu Pele Broberg oqarpoq. Soqutiginninneralli naalagaaffinngorniarnermi periarfissaqartitsisoq, taanna isumaqarpoq. 

Amerikamiulli immikkut aallartitaqarnerat namminneq soqutigisaannik aallaaveqartoq nalunagu oqarpoq, nunatsinniilli taperserneqanngikkunik sorujussuarsinnaanngitsut oqarpoq.

- Qularnanngitsumik qammaaniarsarissapput, qularnanngitsumik periarfissamik ujartuissapput, kisianni eqqaamaqqunarpoq, taakku qanorluunniit kissaateqaraluarpata uagut inuiaat kalaallit eqqartornikuuarput, tassa namminiilivinniarpugut.

USA avaqqukkuminaattoq

Partiilli sinneri namminiilivinnissamik anguniakkamit ungasinnerulersimasutut isornartorsiorpai.

Nunatta USA- mut ilanngunnissaanik sulissuteqarnissaminut qilanaarluni immikkut aallartitatut toqqarneqartoq Jeff Landry nammineq X-ikkut allappoq. Tamannali Pele Brobergimut ernumarujussuartitsinngilaq.

- Nunanut allanut taamatut aallartitat imaannaanngitsorujussuarnik oqartarnikuugaluartut, soorlu Ukrainemi sorsunnermi tunngasut, russinut tunngasut ilaalu ilanngullugit aamma isumaat allanngorsinnaasartut takusarpagut. Kisianni oqaloqatigineqanngippata, isumartik qanoq isillugu allanngortissagamikku?

Amerikamiut siuttuat republikaneriugaluarpat demokratiugaluarpalluunniit amerikamiut nunatsinnut soqutiginnittut Pele Brobergip aamma erseqqissaatigaa. 

Namminiilivinnissarlu anguniagaatillugu USA avaqqukkuminaappoq.

- Taanna aqqut tutsuiginartumik ingerlassappat, aamma sillimaniarneq eqqartortariaqarparput. Tassanilu USA avaqqunneqarsinnaanngilaq. Siunissami, aammami siusinnerusukkut neqeroorutigereeramikku, nunatta sillimaniarnera qulakkeerniarlugu neqerooruteqareernikuummata, taanna tamatta soqutigisarigatsigu erseqqissassallugu aamma pingaaruteqarpoq, Pele Broberg oqarpoq.