Politiit tarnimikkut ikilerneqarsimasut ikiorneqarsinnaanngortut

Anna Louisannguaq Frederiksenip, politiinut ikiortaasimasup, pissusissamisoortoqannginneranik takussutissat siulliit eqqaamalluarpai.

- Sininneq ajuleqqaartalerpunga. Naak qasugaluarlunga nalunaaquttap-akunnerilu 14-15-it innangagaluarlunga, annerpaamik nalunaaquttap-akunnerini sisamani sinittalerpunga, taanna oqaluttuarpoq.

Ukiup ataatsip ingerlanerani marloriarluni uippakajaarnini pissutigalugu napparsimalluni sulinngiffeqartariaqarsimavoq. Politiini pinerluttulerinermillu isumaginnittoqarfimmi misigisaa immikkuullarissuunngilaq, tassami amerlasuut sulinerminnit tarnimikkut kingunerluutinut akiuuttarput.

Politiit pinerluttulerinermilu isumaginnittoqarfimmi sulisut nakuusertunit amerlavallaanit eqqugaasartut misissuinerup Vivemit (2019) ingerlanneqartup takutippaa, amerlasuullu nanertuutaasunik misigisaqartarput soorlu sakkortuumik misigisaqareernermit kingunerluummik PTSD-mik, isumatsassimangaarnermik, isumakuluuteqarnermik uippakajaarnermillu.

Politiit 14,6 procentii uippakajaakulasutut imaluunniit uippakajaaginnaavissutut misigipput. 9,5 procentii PTSD-mik nappaateqalersimasutut naliliiffigineqarsinnaapput. Pinerluttulerinermik isumaginnittoqarfimmi sulisut 33,3 procentii uippakajaakulasutut uippakajaaginnaavissutulluunniit misigipput. 24,3 procentii PTSD-mik nappaateqalersimasutut naliliiffigineqarsinnaapput.

Politiit Anna Louisannguaq Frederiksenitut ittut tapersersorniarlugit kattuffik Thin Blue Line Denmark maanna Nuummi immikkoortortaqarfeqalerpoq.

Nanertuuteqarujussuartut

– Politiit amerlasuut ukiorpassuarni politiiunerminni nanertuuteqarujussualersimapput, taakkulu tapersersorniarpavut, Thin Blue Line Denmarkimi pisortaq Stinne Ølshøj oqarpoq.

Politiiusimasut pinerluttulerinermilu isumaginnittoqarfimmi sulisuusimasut sulisulluunniit taakkualu ilaqutaat isumaginninnikkut suliffimmullu tunngasutigut ikiorniarlugit kattuffik neqerooruteqarpoq.

Politiiusimasut politiiusullu sammisaqaqatigiisittarnerisigut naapinnissaannut sinaakkutillu toqqissisimanartut iluini misilittakkaminnik avitseqatigiinnissaannut periarfissinneqassapput, katsorsartinnikkullu tarnikkut nanertuutigisat suliarilluarneqarsinnaapput.

Kalaallit Nunaanni pissutsit Danmarkimit arlalitsigut allaanerulluinnartut, Stinne Ølshøjip eqqumaffigaa.

- Politiit amerlasuut inunnut ilisarisimasaminnut - ikinngutiminnut, saniliminnut immaqalu ilaquttaminnut - orniguttarput. Tamanna pissutigalugu sulineq ajornakusoornerulersarpoq, taanna oqarpoq.

Suliassaq allaanerusoq kattuffiup eqqumaffigaa, tapersersuinertimmi Kalaallit Nunaanni pissutsinut nalimmassartariaqartoq taanna oqarpoq. 

Ikilerneqaatit namminneq maminnavianngitsut

Anna Louisannguaq Frederiksen napparsimareernermi kingorna siumukarujussuarpoq, misigisalli taamaattut ataavartumik anniaataasinnaapput.

- Imaanngilarmi tarnip pissusaanik ilisimasalimmik oqaloqateqarnikkut suut tamarmik aaqqissasut. Imaassinnaavoq ukiorpassuarni misigisat sakkortuut arlallit aqqusaarneqarsimasut, taamaalillunilu suli kingunerluutit malugineqarsinnaallutik, taanna oqarpoq.

Anna Louisannguaq Frederiksenip neriuutigaa misigisaminit kingunerluutit ataavartut qaangernissaannut Thin Blue Line ikiuutaassasoq.

- Uannut tapersersuinerat aatsaat aallartilaarpoq, immaqali tunngaviunerusumik ikiorsinnaavaannga, taanna oqarpoq.