Politiit sapaatit akunnerata naanerani ulapputtut
Tusarnaartitsineq, aningaasarsiffik aamma Nuummi inuppassuaqarnera politiinik sapaatit akunnerata naanerani ulapititsisimasoq, Kalaallit Nunaata Politiivini pigaartut pisortaat Mark Larsen ataasinngornermi ullaap tungaagut ilisimatitsivoq.
Aqqusinerni nuannattoqarnerata saniatigut ataasinngornerup ullaassaani aamma tillinniarnerit arlallit pisimapput. Tillinniarnerilli pingasut imminnut attuumassuteqarnersut politiit suli paasinngilaat.
- Naluarput suli imminnut attuumassuteqarnersut, kisianni isumaqaleriartuinnarpugut taamaattoqarneranik. Tillinniarnerit ilaanni nukappiaraq 14-inik tigusaraarput, angajoqqaavinullu aatereerlugu, Mark Larsen oqarpoq.
Nuup avataani pisunut ikaarsaalaassagutta, persuttaanerit marlussuit sinerissami pisimapput.
Inuit pingasut politiinit suli tigummigallarneqarput. Politiit maanna paasiniarpaat taakku eqqartuussisumut sassartinneqassanersut imaluunniit iperagaassanersut.
Sapaatit akunnerisa naanerat ulapiffik
Politiit sapaatit akunnerisa naaneranni pisorpassuarnit suliassaqartinneqarsimaqaat. Ilaatigut angerlarsimaffinni eqqissiviilliornerit, persuttaanerit aamma Nuummi pinngitsaaliisimagunarneq suli misissorneqartoq, pigaartut pisortaat oqarpoq.
- Ulappuppugut. Musikfestivalertoqarpoq akissarsiffiullunilu, taakku imminnut ataqatigiinngikkunaraluartut suliassaqaannaavippugut, oqarpoq.
Tallimanngornerup arfininngornerullu akornanni pinngitsaaliisimanermik nalunaarut politiit suli misissuiffigimmassut, pigaartut pisortaat annerusumik oqaaseqarsinnaanngikkallarpoq.
