Politiit radiukkut attaveqaqatigiissinnaanissaat qulakkeerniarneqartoq
Politiit ullumikkut attaveqaqatigiikkaangata, nunatsinni sumiinneq apeqqutaatillugu, tamanna assigiinngitsunik periaaseqarluni pisarpoq, chefpolitiinspektør Henrik Mikkelsen, KNR-imut taama oqarpoq.
- Illoqarfiit ilaanni atortorissaarutit allaapput, illoqarfinnilu allani aamma allaallutik. Taamaammat radiukkut atortorissaarutit assigiit atorlugit attaveqaqatigiissinnaaneq unammillernartut siullersaraat.
Aamma nuna tamakkerlugu oqarasuaatikkut politiinut saaffiginnittarfiup Nuummi aggustip qaammataani ammarneqarnerata kingorna ajornartorsiut minnerulinngilaq.
- Oqarasuaatikkut saaffiginnittarfittaarnitsigut, ualikkut nalunaaqutaq sisamat kingorna aamma arfininngornikkut sapaatikkullu nuna tamakkerlugu atuuttussamik, politiit nuna tamakkerlugu sulisut oqarasuaatit atunngikkaluarlugit saaffiginnittarfimmit attaveqarfigisinnaanissaat pisariaqartipparput. Maannami oqarasuaatinut angallattakkanut sianertoqartarpoq, tamannalu nalorninaateqarsinnaasoq tamatta nalunngilarput, Henrik Mikkelsen taama oqarpoq.
Atortorissaarutit nutaat nalilersuiffigineqartut
Tamannalu tunngavigalugu danskit inatsisinik atuutitsinermut ministereqarfiata nalunaarutigaa Kalaallit Nunaanni Politiit attaveqaqatigiinnermut atortorissaarutinik radiukkut teknologiimik atuiffiusussanik nutaanik pitaartariaqartut. Tamanna danskit inatsisinik atuutitsinermut ministeriaqarfiata Aaja Chemnitz Larsenimut Folketingip Aningaasaqarnermut ataatsimiititaliaatigoortumik akissuteqaataani atuarneqarsinnaavoq.
Atortorissaarutit qanoq ittut pisariaqartinneqarnersut, qanorlu akeqassanersut kiisalu Naalagaaffiup Politiivinit tamakkiisumik aningaasalersorneqassanersut imaluunniit allanit aningaasaleeqataaffigineqassanersut maanna misissorneqaleruttorpoq.
Kalaallit Nunaanni Politiit, Namminersorlutik Oqartussat, KANUKOKA oqartussaasullu allat attaveqaqatigiinnermut atortorissaarutit oqartussaasunit arlalinnit atorneqarsinnaasut pillugit periarfissat 2013-miilli oqaloqatigiissutigaat.
Aamma atuaruk Politiit pitsaanerusunik radiokkut attaveqaateqalilersut
Politichefinspektør Henrik Mikkelsenillu sunik kissaateqarluni ilisimalluarpaa:
- Atortorissaarutit ataatsimoorunneqarsinnaasut iluaqutissartaat tassaavoq pisariaqartitsiffitsinni tamatta taakkununnga attavilersinnaanerput oqaloqatigiillutalu, tamanna tamatta isumaqatigiissutigisinnaagunarparput. Atortorissaarutinulli elektroniskiusunut ataatsimoorussanut tamatta attavilersinnaassagutta tamanna atortorissaarutitigut annertuumik pisariaqartitsiffiussaaq. Isumaqarluinnarpungali periarfissanik ullumikkut piginngisatsinnik taamaaliornikkut peqalissagaluartugut.
Kalaallit Nunaanni Politiit, immaqalu aamma oqartussaasut allat, radiukkut attaveqaqatigiinnermut atortorissaarutinik aalajangersimasunik qaqugu toqqaanissaannut ulluliisoqarsimanngilaq.
Danskit inatsisinik atuutitsinermut ministereqarfiat naapertorlugu, radiukkut attaveqaqatigiinnermut atortorissaarutinut nutaanut aningaasaliissutissat danskit 2017-imut aningaasanut inatsisaanni immikkoortinneqaratik allatigut nassaariniarneqassapput.
