Politiit Nanortalimmi misissuisut

Nanortalimmi corona virusimik tunillatsittoqarnerata kingorna politiit misissuileruttorput, paasisimasaqarnerulertigatilli oqaaseqarusunngillat.
Inatsisinik unioqqutitsineq kinguneqartinneqassanersoq akissutissarsiniarlugu KNR-imit paasiniaraluarparput, politiilli oqaaseqarnissaminnut siusippallaarsoraat. Assi © : Pressefoto/Rigspolitiet
Allattoq Andreas Wille
juulip 29-at 2020 06:40

Nanortalimmi corona virusimik tunillatsittoqarnerata kingorna Kalaallit Nunaanni politiit misissuinertik aallartippaat.

Paasissutissalli tamakkiisut pissarsiaritinnagit apersorneqarusunngitsut, politiit attaveqaqatigiinnermut suliaqartuat, Camilla Palmann KNR-imut paasissutissiivoq.

- Paasissutissat maanna paasiniarneqartut paasitinnagit pisoq pillugu oqaaseqarsinnaanngilagut, taakkua piareeriarpata annerusumik oqaaseqarsinnaassaagut, taanna mailikkut akissuteqarluni KNR-imut allappoq.

Nanortalimmi corona virusimik tunillatsittoq peqqussutinik malinnissimanngitsoq ippassaq KNR-imit oqaluttuaraarput.

AAMMA ATUARUK Coronamik tunillatsissimasoq Nanortalimmi mattusimasimanngitsoq

Misissortinnernut utaqqinermi illoqarfinni mikinerni nunaqarfinnilu asuli angalaartoqaqqusaanngilaq.

Taamaattumik angerlarsimaannartoqartariaqarpoq inunnullu allanut attaveqarnani. Nanortalimmili tunillatsittoq taamaaliorsimanngitsoq, nakorsaaneq Henrik L. Hansen oqaluttuarpoq.

Politiit akiligassiisinnaasut

Taama iliorneq qanoq kinguneqartinneqassanersoq akissutissarsiniarlugu KNR-imit paasiniaraluarparput, politiilli oqaaseqarnissaminnut siusippallaarsoraat.

Politiit pisunut ataasiakkaanut oqaaseqarusunngikkallarput, tamanulli atuuttumik paasissutissiillutik.

- Ajornartorsiutit oqaloqatigiinnikkut aaqqinniartassavagut. Peqqussutit arlaleriarlugit unioqqutikkaanni akilingassiisoqarsinnaavoq, Camilla Palmann allappoq.

Politiit corona pillugu inatsisit unioqqutinneqarpata akiligassiisinnaatitaapput. Nanortalimmili pisumi qanoq pisoqassanersoq suli oqaatigineqarsinnaanngilaq.

Pinngortitaleriffiup umiarsuaa Sanna pisumut attuumassuteqanngitsoq, Pinngortitaleriffiup ataasinngormat nalunaarutigaa.

Tunillatsissimasoq Nanortalimmut tikikkami ilisimasassarsiortut umiarsuaannut ilaavoq. Umiarsuaq pineqartoq nakorsaanerup annerusumik oqaaseqarfingerusunngilaa, naalagaaffeqatigiiffimmiilli aggertuunnginnerarpaa.