Coronamik tunillatsissimasoq Nanortalimmi mattusimasimanngitsoq

Qaammatini marlunni coronamik tunillatsittoqanngereersoq Nanortalimmi tallimanngormat nassaartoqarpoq.

Taanna ilisimasassarsiortut umiarsuaanniissimasoq, taassumalu mattusimasussaatitaanini unioqqutissimagaa, nakorsaaneq Henrik L. Hansen KNR-imut oqarpoq.

- Tunillatsissimannginnermut misiliummik misilinneqarsimatigatik uppernarsaammillu peqartinnatik illoqarfiliartussaanngikkaluarput, nakorsaaneq umiarsuarmi inuttat pillugit oqarpoq.

Inatsisit malillugit misissortinnerup inernerisa utaqqineranni asuli angalaartoqaqqusaanngilaq, taamaattumik angerlarsimaannartoqartussaavoq allanullu attaveqarnaveersaarluni.

Tunillatsissimasorli taamaaliorsimanngilaq.

AAMMA ATUARUK Tamaat isigalugu: Coronavirus pillugu killiffik

- Akissutissarsereerunik aatsaat akuliuttussaagaluarput, kisianni suli akissutissarsinatik illoqarfimmiissimapput, Henrik L. Hansen oqarpoq.

Taamaakkaluartoq nakorsaanerup Nanortalimmi tuniluuttoqarsinnaanera ernummatiginngilaa.

- Nanortalimmi tunillatsittoqarsinnaanera ilimananngittorujussuuvoq. Kisianni inuit tunillatsissimasinnaanermut ersiuteqarunik erngerlutik peqqissaavimmut saaffiginnissapput, nakorsaaneq oqarpoq.

- Inuttat Nanortalimmiunut attaveqarsimaneri killeqartorujussuupput.

- Qanoq killeqartigaat?

- Politiit paasissutissaataat malillugit nalunngiinnarparput, inuttat ilaat peqqissaavimmeereerlutik illoqarfimmi angalaarsimasut.

Tusatsiakkat malillugit umiarsuaq Nanortalimmukannginnermini illoqarfinni allani nunaqarfinnullu allanut aqqusaarsimavoq. Tamanna ilumoorpa?

- Issittumi Sakkutooqarfiup misissuinera malillugu umiarsuaq taamaallaat Nanortalimmiissimavoq. Tusatsiakkanik peqartoq ilumoorpoq, kisianni taakkua ilumuunngillat, Henrik L. Hansen oqarpoq.

Marloriarluni mississortikkami tunillatsissimanngitsoq

Tunillatsissimasoq Nanortalimmi sisimanngormat misissortikkami tunillatsissimanermut ersiuteqanngilaq

Taanna aamma nunatsinnukannginnermini marloriarluni misissortippoq - kingullermik Islandimi.

Tunillatsissimasoq maanna kujataani mattusimaneqarpoq.

Sapaatit akunnerini aqqanilinni nunatsinni coronamik napparsimasoqanngikkaluarpoq, maajip 25-ani tunillatsissimasumik siumuisoqareersorlu maanna tunillatsittoqaqqippoq.

AAMMA ATUARUK Coronamik tunillatsissimasoq Nanortalimmi paasineqartoq

Aasianni Ilulissanilu maajip naanerani tunillatsittoqarpoq, taakkuli tamarmik juunip sisamaani peqqissisutut nalunaarutigineqarput.

Nuummi martsip apriilillu qaammataani tunillatsittut aqqaniliupput. Taakkua tamarmik peqqissereerput. Nuna tamakkerlugu tunillatsissimasuni 13-ini napparsimmavimmut unittoqarnikuunngilaq.

Nanortalimmi tunillatsittoqareernerani nunatsinni tunillatsissimasut 14-nngorput.