Coronamik tunillatsissimasoq Nanortalimmi paasineqartoq

Inuk ataaseq umiarsuarmi ilisimatusaammi ilaasoq Nanortalimmiinnermini coronavirusimik tunillatsissimasutut paasineqarpoq.

Naalakkersuisut taama paasissutissiipput.

Corona pillugu allattoqarfik taama paasissutissiivoq.

Tunillatsissimasoq Nanortallip napparsimmaviani ippassaq misissorneqarpoq, nappaammillu ersiuteqarani. Umiarsuaq taanna maanna nunatta kujataata imartaaniippoq - tunillatsissimasullu inuttat sinneri umiarsuarmeeqatigai.

AAMMA ATUARUK Coronamik tunillatsissimasut marluk peqqissisut: Nunatsinni viruseqartoqanngilaq

Corona pillugu aqutsisoqarfiup tunillatsissiamsoq sumi innuttaassuseqarnersoq ilisimanagu KNR-imut paasissutissiissutigaa.

Umiarsuaq ilisimatusartut umiarsuaat Europamit Island aqqusaarlugu nunatsinnut ingerlaarsimavoq.

Tunillatsissimanngitsoq marloriarluni uppernarsarneqarsimasoq

Corona pillugu allattoqarfiup oqarnera naapertorlugu tunillatsissimasoq Nanortalimmut tikinnginnermini marloriarluni kingullermik Islandimi misissortereersimavoq, taakkunanilu tunillatsissimanani.

Umiarsuarmi marlunnik ilaasoqarpoq, 15-inillu inuttaqarluni.

Umiarsuarmiittut tamarmik akunnialuit Nanortalimmiipput, taakkulu tamarmik eqimattanut pingasunut immikkoortillugit Nanortallip napparsimmaviani coronamut misissorneqarlutik.

Umiarsuaq maanna kujataata imartaaniippoq, umiarsuullu angalanera unitsinneqassasoq innuttaasunullu attaveqarnaveersaassasut umiarsuarmut piumasarineqarpoq.

Nunatta nakorsaaneqarfiata politiit suleqatigalugit paasissutissat immikkuualuttut maanna paasinialeruttorpaat - nakorsaaneqarfiullu tunillatsissimasup attavigisimasai kikkuunersut aamma misissuleruttorlugit.

Nunatsinni kingullermik maajimi coronamik tunillatsissimasoqarpoq. Tunillatsissimasut aappaa Aasianniippoq aappaalu Ilulissaniilluni, taakkuli tamarmik juunip ulluisa sisamaanni peqqisseqqissimasut uppernarsarneqarpoq.

Nuummi marsip apriilillu qaammataani tunillatsissimasut katillugit aqqanilousimapput. Taakkuli tamarmik aamma peqqisseqqinnikuupput. Nunatsinni tunillatsissimasunit katillugit 13-iusunit napparsimmavimmi uninngasoqarnikuunngilaq.

Angerlarsimaffimmi mattusimaneq

Nanortalimmi inuit qanoq iliussanersut pillugu KNR-ip Corona pillugu aqutsisoqarfik apeqquteqarfigaa. Tallimanngornermi ualikkut apersuisoqarsinnaanngitsoq akissutigineqarpoq.

Corona pillugu aqutsisoqarfiup inuit malittarisassanik malinninnissaannik innersuussuteqarfigiinnarsinnaavai - tassa ungasillisimaarneq, tallinut quersorneq assanut spritti atornissaa.

Nappaammik ersiuteqartoqassaguni angerlarsimaffimmut mattuttoqassaaq peqqinnissaqarfimmullu ornigunnani sianertoqassaaq.