Coronamik tunillatsissimasut marluk peqqissisut: Nunatsinni viruseqartoqanngilaq
![](/sites/default/files/styles/image_934x467/public/2020-03-09_15_10_53-flu_virus_-_google_search.png?itok=WbOsj_Ko)
Inuit marluk coronavirusimik qanittukkut tunillatsissimasutut uppernarsarneqartut peqqisseqqipput.
Tamanna misissuinerit ullumikkut akissutissarneqartut takutippaat.
Inuk ataaseq Aasianniittoq allalu Ilulissaniittoq virusimik tunillatsissimasutut uppernarsarneqartut sapaatip-akunnerata siuliani saqqummiunneqarput, taakku maanna peqqisseqqipput.
Misissuinerit akissutaat 35-t ullumikkut akissutersineqarput, taakkulu tamarmik tunillatsissimanngitsutut uppernarsarneqarput. Taamaalilluni nunatsinni piffissami matumani coronamik tunillatsissimasoqanngilaq.
AAMMA ATUARUK Coronamik nutaamik tunillatsissimasoqanngilaq
Naalakkersuisut siulittaasuat, Kim Kielsen nakorsaanerlu Henrik L. Hansen sapaatip-akunnerani matumani nunatsinni corona pillugu killiffik saqqummiuppaat.
Matumanilu tunillatsissimasut Aasianniittoq Ilulissaniittorlu tamarmik ajunngitsut napparsimarulunngitsullu nakorsaanerup oqaatigaa. Taakkulu tunillaasimasinnaaneranut takussutissaqanngitsoq oqaatigalugu.