Coronamik nutaamik tunillatsissimasoqanngilaq

Nunatsinni coronamik tunillatsissimasut suli marluinnaapput.

Tamanna Naalakkersuisut siulittaasuata, Kim Kielsenip nakorsaanerullu Henrik L. Hansenip tusagassiortunik katersortitsineranni saqqummiunneqarpoq.

Taamaalilluni Aasianni ataaseq Ilulissanilu ataaseq kisimik tunillatsissimasuupput.

Taakkulu marluullutik ajunngillat. Tunillatsissimasut arlaannaalluunniit napparsimarulunngilaq, allanullu tunillaasimaneranik takussutissaqanngilaq.

- Taakku, qanitarisaallu malinnaaffigivagut, aamma tunillaasimarpasinngillallu, nakorsaaneq, Henrik L. Hansen oqarpoq.

Nunarpulli juunip ulluisa 15-ianni ammaqqippat aasap ingerlarnerani tunillatsissimasunik allanik takkuttoqarumaartoq, Kim Kielsen oqarpoq.

Ungasinniaritsi, ungasinniaritsi

- Coronamik tuniluuttoqannginnissaanut ungasillisimaarneq pitsaanerpaamik iliuusissaasoq, nakorsaaneq ilassuteqarpoq, kaammattuillunilu: Ataatsimoorfinni annertuuni aasap ingerlanerani peqataaniarussi eqqarsarluaqqaarisi. 

Inuit 100-init amerlanerusut ataatsimoornissaat suli inerteqqutaavoq - nakorsaanerulli oqarnera naapertorlugu kikkut 100-ini ataatsimoortuni peqataanerat apeqqutaalluinnarpoq.

Inuit amerlasuut nunatsinni sumiiffinnit assigiinngitsuneersut imaluunniit Danmarkimeersut allaneersulluunniit peqataagunik - taava tunillatsissimasoq sukkasuumik amerlasuunut tunillaapallassinnaavoq. Peqataasimasullu angerlaqqikkunik suli amerlanerusunut tunillaassapput.

- Peqataajartunnginnissinni isumaliuteqaqqaaritsi. Pingaartumik nunatsinnit sumiiffinnit assigiinngitsuneersut peqataassagunik piffissallu sivikitsuinnaap ingerlanerani angerlaqqissaagunik, Henrik L. Hansen oqarpoq.

Angerlarsimmaffimmit aninaveersaarneq misissortinnerlu

Nunatsinni sapaatini-akunnerni aqqanilinni tunillatsissimasoqarsimanngilaq. Tunillatsissimasorli nutaaq Aasianniittoq sapaatip-akunnerata siuliani paasineqarpoq, ullullu marluk qaangiutiinnartut alla Ilulissaniittoq aamma paasineqarluni.

Killeqarfillu Danmarkimiittoq juunip ulluisa 15-ianni ammaqqippat, tunillatsissimasut amerlanerulissapput.

Taamaammat angerlarsimanissamut misissortinnissamullu malittarisassiortoqarpoq, tassa imaappoq:

• Nunatsinnut aallannginnermi kingusinnerpaamik ullut tallimat sioqqullugit coronavirusimut misilitsinnikkut uppernarsakkamik tunillatsissimassanngilatit.
• Nunatsinnut tikikkuit ingerlaannaq angerlarsimaannaqqusaaneq atuutilissaaq.
• Angerlarsimaannaqqusaaneq Nunatsinnut tikittumut kisimi atuutissaaq. Angerlarsimaannaqqusaaneq inoqutigiit sinnerinut atuutinngilaq, qanippallaarlutik attornaveersaarunik eqqiluisaarluarnissarlu eqqumaffigineqarpat.
• Nunatsinnut tikinnermi ullut tallimassaanni misissorteqqissaatit. Taamaaliussaatit najukkanni peqqinnissaqarfimmut inniminniinikkut. Tunillanneqarsimanngilatit – angerlarsimaannarnerit atorunnaassaaq. Tunillatsissimaguit – angerlasimaffinni mattusimanivit aallartinnissaa pillugu nunatta nakorsaaneqarfianit attavigineqassaatit.
• Tunillatsissimaguit inoqutitit aamma angerlarsimaannaqquneqassapput.
• Angerlarsimaffinni mattusimaneqarnerpit nalaani ilaatigut inoqutigiit najugaqatigisatit naapinnaveersaassavatit, nammineq ineqassallutit ajornanngippallu nammineq perusuersarfeqarlutillu uffarfeqassaatit.  Kingulleq pisinnaanngippat tunillatsissimasoq taaneqartunik atuisimagaangami nammineerluni eqqiaasassaaq.