Politiit kinguaassiuutitigut kannguttaatsuliorneq pillugu nalunaarusioreerlutik, sulinertik sukateriffiginialerpaat

Politiit, oqartussat inunnillu isumaginnittoqarfiit suleriusaat arlalissuartigut aaqqissuussaalluarnerulersinniarneqarput.

Tamanna nalunaarusiami nutaami kinguaassiutitigut kannguttaatsuliorneq pillugu nalunaarutiginninnissamut aporfiit suunersut paasiniarneqarput.

Kalaallit Nunaanni politiit meeqqanut inuusuttunullu kinguaassiutitigut kanngunarsaanermut ajornartorsiut pillugu misissuipput.

Suliniutaallu ersarippoq. Pinerluttuliornerit ikilisinniarneqarput, taamaattoqassappallu nalunaarutiginninnerit amerligallartariaqassapput.

Politiini sulilersitat misissueqqissaarnermi suliaqartut Forebyggelse og Analyse-imik taasamik, tassa kalaallisut pitsaaliuineq misissueqqissaarnermik taasap nunatsinni pinerlunnerit ikilinissaat siunissamilu pinaveersaartinnissaat neriuutigigaat, politiit pisortaata tullersortaa, Viggo Johansen oqaluttuarpoq.

- Kannguttaatsuliornerit atornerluinerillu politiinut nalunaarutigineqarsimanngitsut qanoq amerlatiginersut takujuminaatsittorujussuaat. Taamaattumik ajornartorsiut qanoq annertutiginersoq misissorsimanngilarput, taanna taama oqarpoq.

Kinguaassiuutitigut kanngunarsaanerit ilaannaat oqartussanut nalunaarutigineqartartut erserpoq, tamatumalu ajornartorsiut atatiinnarpaa.

AAMMA ATUARUK Kinguaassiutitigut kannguttaatsuliortarnerit suli paqumigineqarput

Aporfiit iliuusissallu erseqqissarneri

Nalunaarutiginninnissamut aporfiit arlallit politiit misissuinerminni paasivaat. Aaqqitassallu politiit, inunnik isumaginnittoqarfiit, eqqunngitsuliorfigineqartup oqartussallu akornanniipput.

Viggo Johansen nalunaaruteqarnissamut aporfimmik aalajangersimasumik tikkuusserusunngilaq, nalunaarusiarli pissutsit pillugit paasisaqarfiuvoq.

- Kinguaassiuutitigut atornerluisarnermut tunngasumik ilisimasakinneq nalunaarusiap uuma naqissuserpaa. Inuit akornanni aamma soorlu meeqqerivinni, atuarfeqarfinni aammalu sullissisut akornanni annikippoq.

- Kinguaassiuutitigut atornerluisarnerit suunukua? Suuppat? Qaqagukkut killiliissaagut? Pigaangatalu qanoq iliussaagut? Uanga isumaga malillugu nalunaarusiap naqissusernerpaasaa taannaavoq, Viggo Johansen oqarpoq.

Politiit pitsanngorsaanissamut arlalinnik innersuussuteqarput. Taakkulu piviusunngortikkuminarnerniit pingasunut immikkoortiterpaat.

Innersuunneqartunilu pingaarnerpaat ilaat inuusuttunut pitsaaliuinissamut paasititsiniaanermut tunngavoq.

- Siullermik atuarfeqarfinnut politiit pulaartarnerannut tunngavoq, pulaarutta suut sammineqassanersut qanorlu sammineqassanersut erseqqissaasussamik suliaqarpugut. Pingaartumik meeqqanut inuusuttunullu paasitikkusullugu: Kinguaassiuutitigut atornerluisarnerit suuppat? Qaqugukkut qanorlu killiliisoqassava? Assigisaallu, taanna oqarpoq.

Politiit assersuutigalugu nalunaaruteqartoqartillugu suleriusertik allanngortippaat. Siornatigut nalunaartoqaraangat innersuussisoqartartupilussuusimavoq. Nalunaaruteqarniartut soorlu aqaguani aggeqqissasut, aalakkoortullu aalakoorunnaarunik utissasut oqarfigisarsimallugit. Suleriuserli maanna allanngorpoq.

- Pingajuattut immaqa taasinnaasara, suleqatigiinnissamik eqqarsaatersuutaavoq. Pisortat akornanni aammalu susassaqartut allat akornanni, kinguaassiuutitigut atornerluisarnermut akiuiniarnermi suleqatigiinnissaq pingaaruteqartorujussuusoq paasivarput. Taanna pimoorullugu iliuuseqarfiginiarparput, taanna itisiliivoq.

Nalorniguit taava nalunaarutigiuk

Nalunaarusiaq misissueqqissaarnernik arlalinnik imalik ukiup ataatsip missaani suliarineqarpoq. Tassanilu inuit Qaanaami Kujataanilu ilinniarsimallutik sulisut, kinguaassiuutitigut atornerlunneqarsimasut atornerluisartullu katillugit 100-t apersorneqarput.

Nalunaarusiarlu politiit kinguaassiuutitigut atornerluinnerit pillugit pimoorussinerannik takussutissaasoq, Viggo Johansen oqarpoq.

- Tassunga tunngatillugu qanoq suleriuseqassanerluta angusassarput anguniarumallugu paasisaqarluareerluta sulerusuppugut. Taamaattumik aamma paaserusussimavarput sooruna kannguttaatsuliortarnerit atornerluisarnerillu nalunaarutigineqarneq ajorsimasut, taanna oqarpoq, nangillunilu:

- Aamma qanoq isilluta suleqatigisassagut peqatigalugit meeqqat inuusuttullu ikiorneqarnissaminnik pisariaqartitsisut ikiorserneqarnissaat qulakkeersinnaavarput paaserusullugu.

AAMMA ATUARUK Borgmesteriuneq kinguaassiuutitigut kanngunarsaasimasutut allaaserineqareerluni tunuarniuteqartoq

Kinguaassiuutitigut kanngunarsaarinermut tunngasuinnarmik suliaqartussat 13-it atorfinitsinnissaat politiit naatsorsuutigaat. Innutaasunillu paasititsiniaasoqarnerulerpat, nalunaarutiginninnerit amerleriarnissaat, Viggo Johansenip naatsorsuutigaa.

Kajumissaarullu ersarippoq.

- Kannguttaatsuliorneq unioqqutitsinerunersoq aammalu nalunaarutigineqarnissaa pisariaqarnersoq eqqarsaatigeqqunagu innersuussutigisinnaavara. Taamaattumik eqqarsaatigeqqunanngilaq inatsimmi sumi allaqqava, qanorlu allaqqava. Taamaattumik killissamik qaangiiffigitissimasorigaanni taava politiit attavigineqassasut innersuukkusunnarpoq. Taava misissussuarput, inatsisillu suut unioqqutinneqarsimanersut naliliiffigiumaarpagut.

AAMMA ATUARUK MIO: Inunni kikkuugaluartuni kinguaassiutitigut naapertuilluanngitsuliortoqartarpoq

Kinguaassiuutitigullu kanngunarsagaaneq peqqamminngikkaluartoq politiinut nalunaarutiginninnissaq pisariaqartoq, Viggo Johansenip erseqqissarpaa.

Nunatsinnimi ajornartorsiut qanoq annertutiginersoq nalunaarutiginninnerit amerlinerisigut aatsaat paasineqarsinnaavoq, amerlanerillu ikiorneqarsinnaassallutik.

- Sapinngisamik amerlanerpaat nalunaarutiginninnissaat neriuutigaarput. Aammalu takusinnaalerlugu Kalaallit Nunaata politiivinut nalunaarutiginnittarnerit amerleriagaatsiassasut, taannalu anguniagaavoq.