Naligiissitaanissamut Siunnersuisoqatigiit: Kinguaassiutitigut kannguttaatsuliortarnerit suli paqumigineqarput
USA-mi isiginnaartitsisartup Alyssa Milanop namminermisut kinguaassiutitigut kannguttaatsuliorfigineqarsimasut Twitteri inuillu internetikkut attaveqaataat allat atorlugit #Meetoo ingerlaartinniarlugu allassagaat inunnut ukiup ataatsip matuma siornatigut kaammattutigaa.
Milanop taama kaammattuuteqarnera nunarsuaq tamakkerlugu kingorna siammarterneqalertupallappoq, arnarpassuit misigisimasatik #Metoo aqqutigalugu sassarlutik oqaluttuarlutik.
Nunatsinni taama aamma qisuariartoqarpoq, kinguaassiutitigulli kannguttaatsuliorfigitinnerit amerlassusaat eqqarsaatigalugit sassartut amerlagisassaanngitsut, Kalaallit Nunaanni Naligissitaanissamut Siunnersuisoqatigiit siulittaasuat Kitdlak Knudsen isumaqarpoq.
- Paqumigineqarnera tamaanga killilertariaqarpoq, aamma sammisaq oqaluuserineqalertariaqarpoq, Kitdlak Knudsen oqarpoq.
Naligiissitaanissamut Siunnersuisoqatigiit siulittaasuata kalaallit suliffeqarfii kaammattorusuppai suliffeqarfimminni kinguaassiutitigut kannguttaatsuliorneq pillugu suli politikkiliorsimanngitsut ersarissunik politikkinik maleruagassanillu suliaqaqqullugit.
