Borgmesteriuneq kinguaassiuutitigut kanngunarsaasimasutut allaaserineqareerluni tunuarniuteqartoq

Frank Jensen, Københavnimi borgmesteriunertut, Socialdemokratillu siulittaasuata tulliattut tunuarniuteqarpoq. Frank Jensen arnanik arlalinnik kinguaassiuutitigut kanngunarsaasimasutut tusagassiutini ulluni kingullerni allaaserineqareersorlu nammineq tunuarniuteqarpoq.

Frank Jensen tusagassiortunik ullumi ataasinngornermi katersuutsitsinermi taama ilisimatitsivoq. Københavnimi parteeqatiminit tapersersorneqarnini tamannalu pillugu borgmesteriunertut ingerlaannarniarnini Frank Jensenip nalunaaquttap akunneri 13-it matuma siornatigut nalunaarutigigaluarpaa.

- Københavnimi borgmesteriunertut socialdemokratinit amerlanerussuteqarluartunit borgerrepræsentationimilu ilaasortaqatinnit tapersersorneqarnera ippassaq unnukkut nuannaarutigeqaara, Frank Jensen oqarpoq, nangillunilu:

- Maanna sinereerlunga eqqarsalerpunga: Tamanna politikkikkut sulininnut akornusersuisinnaavoq.

- Taamaammat borgmesteriunertut tunuarniarlunga aalajangerpunga. Maanna uanga, Frank Jensen, Københavnip borgmesteriunerata allaffia qimalerpara. Ullumilu taamaaliussaanga, Frank Jensen oqarpoq.

Taanna Københavnip kommuniani ukiuni aqqanilinni borgmesteriuneruvoq, Socialdemokratillu siulittaasuata tulliatut ukiuni arfineq-pingasuni issialluni. Politikkikkut katillugit ukiuni 33-ni suliaqarpoq.

Parteeqataa, Lars Weiss, Københavnimi borgmesteriunerugallartutut maanna inississaaq.