Politiit kattuffiata siulittaasuat: Pitsanngorsaanissamut atugassarititat politiillu amerlanerusut pisariaqartinneqarput

Danskit inatsisinik atuutsitsinermut ministeritaavata Nicolai Wammenip (Socialdemokraterne) politiit sulianik unitsitsisarnerannut periuseq allanngortikkusuppagu ajunngilaq. Aningaasaqarniarnerli politiillu amerlanerulernissaat eqqarsaatigalugit pissutsit pitsaanerulinngippata pingaarutilinnik allannguinissaq ajornakusoortuuvoq.

Heino Kegel, politiit kattuffianni siulittaasoq taama naliliivoq.

- Tamanna tupaallaatiginngilarput, aamma (Nicolai Wammenip, aaqq.) siunissami allannguisoqarnissaanik kissaateqarnini erseqqissarmagu pissutissaqarluarpoq. Isumaqarpunga tamanna tamatta assortunngikkipput. Suliassaqarfimmi assigiinngitsoqarneranut tunngatillugu kisiannili aamma misissuinermi normunik atuivallaarnermut tunngatillugu.

- Taamaakkaluartoq danskit politiivini tunngaviusumik ilungersunartoqarpoq. Tassa atugassarititat naammannginnerat pissutigalugit aalajangersimalluinnartumik pingaarnersiuisariaqarneq, Heino Kegel oqarpoq.

Nicolai Wammenip Naalagaaffiup Kukkunersiuisoqarfiata Naalagaaffiullu Naatsorsuutaannik Kukkunersiuisut politiinik qanittukkut isornartorsiuinerat qisuariarfigaa.

Naalagaaffiup Kukkunersiuisoqarfia, politiit sulianik inunnut navianartorsiortitsinermut tunngasunik aningaasatigullu pinerluuteqarnermut tunngasunik unitsitsisarnerat, nalunaarusiani marlunni "naammaginanngilluinnarnerarlugu“ inerniliivoq.

Suliat inunnik navianartorsiortitsilluni pinerlunnermut tunngasut politiinit naammassineqarsimasinnaagaluartut naammassinngitsoorneqarsinnaanerat aarlerinaateqartoq, ilaatigut allassimavoq.

Innersuussutigisat marlunnik kisitsisitallit

Aammattaaq Naalagaaffiup Kukkunersiuisoqarfiata suliat inoqammut navianartorsiortitsilluni pinerlunnermut tunngasut 5900-t suliallu aningaasatigut pinerlunnermut tunngasut 7100-t, politiinit paasiniarneqartutut pinerlineqartumut nalunaarutigineqariarlutik suli paasiniaanertaqanngitsut, nassaaraat.

Naalagaaffiup Naatsorsuutaannik Kukkunersiuisut Naalagaaffiullu Kukkunersiuisoqarfia politiinut innersuussutigisanik marlunnik kisitsisitalinnik ataatsikkut tunniussipput, Nicolai Wammenillu taakkua tamaasa misissorniarpai.

Heino Kegelip oqarnera naapertorlugu siunertarineqartut pitsaapput, taamaattorli politiit maannakkut atugassarititaat eqqarsaatigalugit aamma isumaqarpoq, politiit innuttaasunut pakatsisitsinnginnissaat ajornakusoortuusoq.

- Isumaqartoqarpat suut tamaasa iliuuseqarfigissagivut, iluatsinnavianngilagut, tamanna qularutissaanngilaq. Pingaartumik isumannaallisaanikkut pissutsit massakkut inissisimaffigisagut eqqarsaatigalugit, taanna oqarpoq.

- Innuttaasut politiit sunik suliaqarnissaannik sunillu suliaqartannginnissaat pillugu isumaat paasiniartariaqartussaassavarput. Politiit suli saqquminerunissaat aammali sulianik paasiniaanermik suliaqarnerunissaat kissaatigineqartorujussuuvoq. Tamanna anguniarlugu politiit amerlanerusariaqarput, taanna oqarpoq. 

/ritzau/