Politiit isumannaallisaanermi minneq pillugu kalerrisaarineq: Innuttaasut toqqissisimannginnissaat siunertaanngilaq
![](/sites/default/files/styles/image_934x467/public/article_images/sirene_0.jpg?itok=5NHUDcd3)
Nuummi sapaammi ullaakkut ajunaalernermi kalerrisaarutip aallartinneratigut itertinneqarput. Siggartaallu aallartikkaangat, innuttaasut illup iluanut iserlutik, susoqarsimanera pillugu radiukkut nalunaarutigineqarnissaa utaqqisartussaavaat.
Tassa maleruagassat taamaapput. Pisunulli taamaattunut maleruagassaq taanna tulluunnersoq, nalornisitsivoq.
- Innuttaasuniit ajunngitsumik paasinnittut isumaqarpunga. Kisianni innuttaasunut attuumassuteqanngitsumik taamatut kalerrisaarigaangatta, inuttaasut aamma misigilertaramik; aasiit kalerrisaarileqaaq, immaqa-aasiit soqutaanngitsoq.
AAMMA ATUARUK Upalungaarsimaniarneq Nuummi unitsinneqarpoq - kukkusoqarsimagunarpoq
Taamaammat isumannaallisaaneq peqqutigalugu illoqarfik tamaat taamatut kalerrinneqartarnissaa ilumut pisariaqarnersoq eqqartorneqartariaqarsorineqarpoq.
- Isumannaallisaaneq peqqutigalugu mittoqassatillugu ajunaalernermi kalerrisaarut innuttaasunut tamanut kalerrisaarutigineqartarnera allanngortittariaqarnersoq pillugu, Kalaallit Nunaanni politiit sapaatit akunnerata tulliani ataatsimiigiaqqusissaaq, politikommissæri Gideon Quist oqarpoq.
Tamatsinnut tupannarpoq
Air Greenlandip timmisartuutaa Dash-8 GL1540 Nuummiit Kangerlusuarmut aallarnermini motoriata aappaa ajornartorsiulerpoq. Taamaammallu sillimaniarluni Nuummut uterluni mikkiartoqqippoq.
Nuummi Kalerrisaarutip aallartinnerata kingorna innuttaasut paatsuungaqisut Facebookikkut allattut arlaqarput. Politikommissærip Gideon Quistip, KNR-imut oqaarigaa kalerrisaarineq ”kukkunerugunartoq”. Kukkunerunngilarli. Pisummi kingunitsiannguat Mittarfeqarfiit nalunaarpoq maleruagassat malillugit iliuuseqarsimallutik - timmisartoqqarfiup atortorissaarutaasa illutaani ingerlatsisup periusissani maleqqissaarlugu, timmisartup sillimaniarluni minnissaanut 20 minutsip sioqqullugit kalerrisaarut toorpaa.
AAMMA ATUARUK - Naagga kalerrisaarineq kukkunerunngilaq: upalungaarsimanermut pilersaarut malinneqarpoq
Mittarfeqarfinni attaveqaqatigiinnermut pisortap, Malene Lyngep oqarnera naapertorlugu, siggartaatip aallartinneqarnera innuttaasunut toqqissisimanngitsitsigaluartoq, pisortaqarfiit suleriusertik malinnissaat pingaaruteqartoq, isumaqarpoq.
- Siggartaat taamaallaat mittarfinni pisoqartillugu toorneqarneq ajorpoq, allanit aamma aallartinneqartarpoq. Umiarsualivinni pisut, immaqaluunniit arlaannik pisoqariataarpat kalerrisaarut taanna tamatsinnut kalerrisaarutitut atorneqartussaavoq, pissutsinut assigiinngitsunik pisoqartillugu, taanna oqarpoq.
Ajunaarnersuaqalertillugu aatsaat kalerrisaarisoqartassasoq
Periuserli taanna innuttaasunut toqqisisimanngitsitsisarnera allanngortinniarlugu, Kalaallit Nunaanni politiit allanngortitserusupput.
- Taannaana unitsinniarlugu, annikillisinniarlugu suleqatigut soorlu qatserisartut mittarfeqarfimmiittut taavalu sakkutooqarfimmiittut oqaloqatigisariaqarpagut arlaannik una suleriaaseq allanngortissaneripput.
Sulinermi periuseq eqqortoq atorneqarpoq…kisiannili allanngortikkusupparsi?
- Mittarfeqarfiit periusissartik malillugu iliorput, aamma tamanna apeqquserneqanngilaq politiiniinngaannit. Kisianni periuseq taanna ilumut atuinnassanersoq eqqartortariaqaripput isumaqarpunga.
Timmisartoq sillimaniarluni mimmat 14-inik ilaasoqarpoq, pisulli nalaani ilaasullu tamarmik eqqissisimasut, Air Greenland ilisimatitsivoq.