Politiit inuup timaata ilai pillugit: Angutip kalaaliunissaa ilimagilluinnarparput
![](/sites/default/files/styles/image_934x467/public/article_images/jan_lambertsen.jpg?itok=v8feNTtu)
- Toqutaasup kinaanera paasingajalerunarparput. Pineqartullu angutip kalaaliunissaa ilimagilluinnarparput.
Kalaallit Nunaanni Politiit misissueqqissaarnermut immikkoortortaqarfiani pisortaq, Jan Lambertsen oqarpoq.
- Tamanna misissuinerit takutippaat, misissueqqissaarnermulli atatillugu annerusumik oqaaseqarsinnaanngilanga.
- Soorunami DNA, kigutit assigisaalu misissugassaapput, kisianni pineqartup kinaanera paasingajalerparput.
Jan Lambertsenilli pineqartup aqqa KNR-imut oqaatigerusunngilaa.
Politiit qatserisartullu ikuallaavimmi eqqagassanik ulluni arlalinni misissuipput.
Tamanna Ilulissani ikuallaaviup eqqaani inuup timaata ilaanik sapaatiummat nassaartoqarneranik politiit nalunaaruteqarnerata kingunerisaanik pivoq. Inuup timaata ilaanik nassaartoqaqqittoq politiit marlunngornermi paasissutissiissutigaat.
AAMMA ATUARUK Pinerluttoqarsimaneranik toqusoqarneranillu misissuisartut Danmarkimit Ilulissanut tikittut
Taamaammat Danmarkimit pinerluttoqarsimaneranik toqusoqarneranillu misissuisartut Ilulissanut misissuinerup ingerlanerani ikiuukkiartorput.
Eqqagassat assallugit misissuiffigineqaleruttorput – eqqakkallu tamarmik ataasinngorneq oktobarip aqqarnanni misissorneqareersimanissaat politiit maanna nalilerpaat.
- Ikuallaavimmit assigiinngitsunik misissueqqissaarnermut attuumassuteqartunik aamma pissarsiaqarpugut, suunerili oqaatigisinnaanngilakka. Paasissutissat kingusinnerusukkut uppersaataasinnaammata isertuuppagut, Jan Lambertsen KNR-imut oqarpoq.
AAMMA ATUARUK Politiit suli paasisaqanngitsut: Toqutsinermik suliami ullut sisamassaat paasiniaasut
Politiit suliamut atatillugu pasisaqannginnerat pissutigalugu suli tigusaasoqanngilaq.
Nunatsinni maqaasineqartut saniatigut Danmarkimi maqaasineqartut politiinit aamma misissorneqarput. Misissueqqissaartartullu pisortaata iluliarmiut suleqataalluarnerat
Iluliarmiut tapersersuingaatsiarput. Suleqatiginnikkumalluarlutillu paasinnipput. Soorunami toqqissisimanngillat, kisianni ilisimasaminnik avitseqatiginninnissamut pikkorilluinnarput. Taamaaliunnassappullu.