Angummut Nuummi savilersornermut: Politiit ilisimannittussarsiortut

Politiit Nuup ilaani Nuussuarmi sakkortuumik ataasinngormat unnukkut saassussinermut ilisimannittussarsiorput.

Politiit angut savimmik kapineqarsimalluni pisiniarfiup Akikip eqqaani nalasoq pillugu nalunaaqutaq 19.53 nalunaarfigineqartut, Sermitsiaq.AG allappoq.

Angut 27-nik ukiulik ataasinngormat napparsimmaviliaanneqartoq inuunerminilli navianartorsiunngitsutut marlunngornermi nalunaarutigineqartoq pineqarpoq.

Angut 26-nik ukiulik tigusarineqareerpoq, inatsillu tunngaviusoq malillugu matoqqasumik marlunngormat killisiorneqarluni.

26-nik ukiulik toqutseriartutut pasineqarpoq, ullunilu 28-ni tigummigallarneqassasoq Eqqartuussisoqarfik Sermersooq aalajangerpoq.

Politiit ilisimannittunik maanna attaveqarusupput.

- Susoqavissimanersoq pillugu paasiniaaneq pasineqartup maanna tigummigallarneqarnerani aallartissavarput. Tamatumunnga atatillugu ilisimannittunik Nuussuarmi Akikip eqqaani ataasinngormat unnukkut pasinarsinnaasunik, perulluliortoqarneranik assigisaanilluunniit takusaqarsimasunik suliamilluunniit allanik ilisimannittunik aattaveqarusuttupilussuuvugut, paasiniaasartunut immikkoortortortaqarfimmi aqutsisoq, politikommissæri Malik Sandgreen oqarpoq.

Politiit ulluni tulliuttuni Nuussuarmiinnerusarumaarput.

Suliamut tunngasunik arlaannik paasissutissaateqaruit najugaqarfinni politiinut paasissutissiisinnaavutit Kalaallit Nunaata Politiivinulluunniit sianersinnaallutit, normumut 70 14 48.