Angut 27-nik ukiulik Nuummi savimmik kapineqartoq

Angut 27-nik ukiulik Nuussuarmi aqqusinermi nalasoq ataasinngormat unnukkut siumorneqarpoq. Taanna savimmik kapineqarsimavoq, inuunerminilli navianartorsiunngitsoq marlunngornermi nalunaarutigineqarpoq. Savimmik kapisineq Kalaallit Nunaanni Politiit misissorpaat pasisamillu tigusarinnillutik.

Allattoq Mathilde Justesen Ranners

juulip 04-at 2023 10:21

Nutserisoq Nathan Kreutzmann

Angut 27-nik ukiulik Nuummi Nuussuarmi ataasinngormat unnukkut savimmik kapineqarpoq.

Savimmik kapisisoqarneranik politiit nal. 19.53 nalunaarfigineqarput. Angut savimmik kapineqarnermi kingorna aqqusinermi pisiniarfiup Akikip ungasinngisaani nalasoq nalunaarutigineqarpoq. Sermitsiaq.AG taama allaappoq.

Angut 27-nik ukiulik savimmik kapineqarsimagaluarluni inuunera marlunngornermi ullaakkut navianartorsiunngitsoq vicepolitiinspektøri misissueqqissaarnermilu pisortaq Lars Bjerregaard Sermitsiaq.AG-mut paasissutissiivoq.

Pisumut tunngatillugu pasisaq tigusarineqartoq

Pisoq politiinit misissorneqarluni paasiniarneqaleruttorpoq angullu 26-nik ukiulik savimmik kapisisimasutut pasineqartoq tigusarineqarpoq.

Aamma atuarukNukappiaraq 16-inik ukiulik Nuummi Qinngutsinni ajunaarpoq

Qanorpiaq pisoqarsimanera, soorlu sumerpiaq savimmik kapisisoqarsimanersoq vicepolitiinspektørip oqaatigisinnaannginnerarpaa:

- Qanoq pisoqarsimanersoq misissuleruttorparput, Lars Bjerregaard Sermitsiaq.AG-mut oqarpoq.

Misissuineq apeqqutaassammat 26-nik ukiulik inatsit tunngaviusoq malillugu killisiorneqassanersoq politiit suli aalajanginngilaat.

KNR politiinik oqaaseqartitsiniarsarivoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.