Politiit akiuussutissamik kapitissimanersutit paasiniarlugu unnuap-qeqqanit misilittaaffigissavaatsit

Inuit 20-nit amerlanerullutik katerinnissaannut inerteqquteqarneq nunatta ilarujussuani unnuap-qeqqanit atuukkunnaassaaq.

Amerlanerpaat qanermut assiaquteqarunnaassapput – taarsiulluguli imerniartarfimmut, atuakkanik atorniartarfimmut, arsaattarfimmut allanullu isernissamut tamakkiisumik akiuussuserneqarsimassaagut.

Sutorniartarfimmi issiatillutit politiit uppernarsaammik takunnikkumappata uppernarsaat takutissavat.

Politiilli qanoq akulikitsigisumik taamaaliussappat? Aasaaneranimi sulinngiffeqarnerup nalaani qanoq amerlatigisut taama suliaqarsinnaanissaat killeqarsimassaaq?

- Ernumagivallaanngilara, Kalaallit Nunaanni Politiini politimesteri, Bjørn Tegner Bay KNR-imut oqarpoq.

- Tuniluuttoqarnera tamaat innuttaasunit tapersersorneqarluarpugut. Akiuussuserneqarsimanermullu piumasaqaammik atuuttoqalerneratigut amerlanerpaat tamanna piareersimaffigissagaat ilimagaara.

Politiit sutorniartarfinnut, imerniartarfinnut, arsaattunut allanullu misissuillutik nakkutiginnittassapput. Qanorli misilittaatigissanersut politimesterip oqaatigerusunngilaa.

AAMMA ATUARUK Corona pissutigalugu killilersuinerit Upernavimmi Aasiannilu atuutiinnassasut

- Ilaatigut assersuutigalugu sutorniartarfimmut iserluta ilaat misissortassavagut. Ilaatigut silataani iserniartut tamarmik misissuiffigisassavagut.

- Isumalluutinik pisariaqartinneqartunik sulisoqarnissarput qularnanngilaq. Kisianni pinngitsaaliilluni atornerluinerit arlaliuneranik pisoqarfiusumillu ulloqarnerani ulloq taanna nakkutiginnittassanngilagut, Bjørn Bay oqarpoq.

- Nakkutiginninnernut pilersaarummik aggustip ulluisa qulinganuugallartumik atuuttussamik sapaatip akunnerata tulliata aallartinnerani pilersaarusiussaagut.

- Misissukkatta 95 procentii tamakkiisumik akiuussuserneqarsimappata taava misissuivallaartarunnaassaagut – misissorneqartulli 50 procentiisa malittarisassaq malinngippassuk taava misissuinerulissaagut, politimesteri oqarpoq.

Unnuap-qeqqanit ukununnga iserniaruit tamakkiisumik akiuussuserneqarsimassaatit:

• Neriniartarfiit, sutorniartarfiit, imerniartarfiit assigisaalu taakkulu silataaniiffiusinnaasortaat.
• Kulturikkut suliaqarfiit – matumani kulturikkut illorsuit, filmertarfiit, katersugaasiviit saqqummersitsiviillu.
• Innuttaasut illui assigisaalu.
• Atuakkanik atorniartarfiit.
• Illup iluanilu silami eqaarsaarnermi atortut – matumani eqaarsaartarfiit, timersortarfiit, naluttarfiit, timigissartarfiit arsaattarfiillu ilanngullugit.
• Nujalerisut, tagiartuisartut, pinnersartittarfiit assigisaalu.   
• Pisiniarfinni, allakkerivinni, mittarfinni, ullunerani paaqqinniffinni, ilinniarfeqarfinni utoqqaat illuini tamakkiisumik akiuussuserneqarsimanissaq piumasaqaataanngilaq.

Sutorniartarfinni piginnittoq timigissartarfimmiluunniit siulittaasoq aamma misissuisinnaavoq – tamannali piumasaqaataanngilaq.

Naggammik akiuussuserneqareersimaguit sullisivik.gl aqqutigalugu paasissutissat danskit coronapasianut ilanngutitinneqarnissaannut piumasaqarsinnaavutit.

Coronapas appstorekkut playbutikkikkulluunniit aasinnaavat.

Qarasaasianik atuivallaartanngikkuit akiuussutisserneqarsimanermut paasissutissat e-boksinnut pdf-inngorlugit nassiunneqarnissaat piumasinnaavat. Taanna anillatseriarlugu kaasarfimmiorsinnaavat.

Aamma allamik ajornanngitsunnguamik periarfissaqarpoq: Akiuussuserneqarlerninni pappiaraq atinnik kapitinnernullu piffissamik allagartaqartoq aamma tigummiinnarsinnaavat.

Imerniartarfimmiikkuit uppernarsaallu qimassimagukku tamanna aamma ajoqutaanavianngilaq.

Uppernarsaateqarnak illoqarfissiorsinnaavutit

- Uppernarsaateqanngikkuit tamakkiisumillu akiuussuserneqareersimaguit – taava illoqarfissiorsinnaavutit. Misissuiffigigutsigit nikorfaqatigininni Peqqinnissamut naalakkersuisoqarfimmi suleqatigisatsinnut sianissaagut. Taakku journalit quppissavaat tamakkiisumillu akiuussutisserneqarsimanersutit oqaluttuulluta, Bjørn Tegner Bay oqarpoq.

- Tamakkiisumik akiuussutisserneqarsimanngitsut akiligassinneqassapput. Taakkulu sumiiffimmit ingerlaqquneqarlutik.

- Akiligassiissutigineqartussap annertussusaa suli ilisimaneqanngilaq. Suliat siulliit takoqqaarlugit akiligassiissutigineqartussap annertussusaa aatsaat oqaatigisinnaavarput. Kisianni tamanna angerlarsimaannarnissamik malinninngitsunut akiligassiissutaasarput naligissavaa – tassa 3.000 koruunit missaat. Tamannali suli aalajangerneqanngilaq, politimesteri oqarpoq.

Aasianni, Upernavimmi Upernaviullu qanittuani inuit 20-nit amerlanerusut katersuuteqqusaanngillat tamanillu ornigarfigineqarsinnaasuni kikkut tamarmik qanermut assiaquteqassapput.

Tamanna aqunneqarsinnaanngitsumik tuniluuttoqarneranik pissuteqarpoq.