Folketingimut qinersineq 2015 Politiit akissarsiaat assigiissapput

Politiitut sulisut assigiimmik akissarsiaqartinneqassapput. Partiit Folketingimut qineqqusaartut arlallit taama isumaqarput. Kisianni politiit danmarkimi suleqatimi akissarsiaannut assingusoq angoreerpaat, Politiit peqatigiiffianni siulittaasoq oqaluttuarpoq.

Qineqqusaarneq aallartimmat, partiit Atassut, Partii Naleraq Demokraatillu qineqqusaarutigaat naalagaaffiup ataani politiitut sulisut assigiimmik akissarsiaqartinneqalissasut.

- Kalaallit Nunaanni politiit taavalu suleqatai danmarkiminngaannit tikittut allarluinnarnik atugassaqartinneqartarput. Taamaattumik tamakku naleqqussarneqartariaqarput, Partii Naleqqamit folketingimut qineqqusaartoq, Per Rosing Petersen taama oqarpoq.

 

Assingulereerput
Kalaallit Nunaanni Politiit peqatigiiffiata siulittaasuata Finn Jeppesenip oqaluttuaraa, Kalaallit Nunaanni Danmarkimilu politiitut sulisut akorngini ukiorpassuarni anguniagaasimasoq assigiimmik akissarsiaqartitsinissaq anguneqarsimasoq.

Ullumikkut assigiinngissutituaavoq Kalaallit Nunaannit suli iluatsinneqanngitsoq tassaasoq danskit politiivisa tapisiarisartagaat, sumiiffimmi suliffigisami tapisiaq. Tapisiarlu taanna isumaqatigiinniutaaleruttorpoq, aningaasanillu 1500 koruunit missaanniittunik amerlanerusunik pisartagaqalernissamik kinguneqassalluni.

- Aningaasarsiat eqqarsaatigissagaanni, danskit suleqatitta akissarsiaat assigilernissaannut qanittuararsuuvugut, Finn Jeppesen oqarpoq.

 

Ilumoornerarpaa
Demokraatinit folketingimut qineqqusaartoq Poul Hansen, politiiuvoq, taassumalu nassuerutigaa, politiit akissarsiaat assigiingajaqqissaartut. Tamanna qaninnerulerpoq nunatsinni politiit 2009-miilli danskit politiivisa akissarsiaat anguniarlugit tapisiarisartagaat utoqqalinersiaqaataasinnaalermat, Poul Hansen oqaluttuarpoq.

- Nammineerlunga nalunngilara, politiit aningaasarsiaat nalimmassarlugit iluatsiliivittut. Pensiuuninut tunngasortat tassa taanna annikittumik iluarsisariaqartutut isigineqartariaqarpoq, Poul Hansen oqarpoq.

 

Qineqqusaartunut kajumissaarivoq

Ilumoortorlu unaavoq, politiitut sulinerup iluani akissarsiat assigiinnerusut anguneqareerput. Taamaattumik Kalaallit Nunaanni politiit peqatigiiffiata siulittaasuata politikerit kajumissaarpai, politiit sulinermi atugassarititai qiviarneroqqullugit.

- Politikerit assigiissaarineq eqqartussagunikku sulinerup sivisussaata assigiisilernissaanut kajumissaarsinnaavakka. Tamanna Namminersorlutik Oqartussat iluanni aaqqinneqarsinnaavoq. Taassuma saniatigut qitornartaarnermi sulinngiffeqartarneq kalaallit nunaanni atugassaritita danmarkimi atugassarititanit ajornerujussuupput, taamaattumik kajumissaarsinnaavakka taakku assigiissaarneqarsinnaaneri, Politiit peqatigiiffianni siulittaasoq, Finn Jeppesen taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat