Royal Greenlandip kilisaataataasa ilaanni hashi annertooq politiinit nassaarineqartoq

Danmarkimi Jyllandip avannarpasissuani politiit Royal Greenlandip kilisaataataasa ilaanni raajanik ippassaq arsaarinninnatik, ikiaroornartumik hashimik annertuumik arsaarinnipput.

Ikiaroornartoq hashi 21 kiilu kilisaatip M/TR Avataq-p usilersortarfiani nassaarineqarput. Umiarsuaq Frederikshavnip amutsiviani sapaatit-akunnerini arfinilinni uninngasimavoq.

TV2 Nordjylland taama allappoq.

Danmarkimi akileraartarnermi oqartussat siusinnerusukkut umiarsuarmiissimapput, hashilu 1 kiilu tassani nassaarisimallugu.
Politiit tamanna pillugu kalerrinneqarput, hashilu annertunerujussuaq taamaalinerani nassaarineqarluni.

AAMMA ATUARUK Politiit pisortaat: Ikiaroornartut sakkortunerusut nunatsinni peqartartoq

Kilisaat 22-nik inuttaqarpoq, arlaannaalluunniillu hashimik pineqartumik attuumassuteqannginnerarput, tamannalu pillugu suli tigusarinnittoqarani.

Nordjyllands Politi suliami misissuileruttorput, takussutissat videokkullu assilisat aallaavigalugit misissuillutik.

Kilisaat Frederikshavnimit ataasinngornermi unnukkut Thórshavnimut ingerlaqqittoq TV2 Østjyllandip allaaseraa.

Royal Greenlandip oqartussat hashimik nassaartoqarneranut tunngatillugu suleqatigigai, Royal Greenlandimi attaveqatigiinnermut ingerlatsisoq Masaana Egede oqarpoq. 

- Oqartussat suliami tassani tamakkiisumik suleqatigaavut. Ikiartoornartorlu kilisaataatitsinni akuersaanngilluinnaripput ilanngullugu erseqqissaatigissavara, taanna allappoq.