Ilulissani nittarsaassinissaq PolarExpo aappaagumut kinguartinneqartoq

Nunatsinni inuit amerlanerpaamik 100-it katersuussinnaaneranut killiliineq suli atuuppoq.

Taamaammat aalisarnermut piniarnermullu nittaarsaassinissaq PolarExpo Ilulissani pisussaagaluartoq Avannaata Kommuniata Aalborg Kongres & Kultur Centerillu kinguartippaat.

Nittaarsaassinissaq, Ilulissani ukioq manna oktobarimi arfernanit arfineq-pingajuannut ingerlanneqartussaagaluartoq aappaagu upernaamut kinguartinneqarpoq. Nittarsaassinissamik aaqqissuisut Aalborg Kongres & Kultur Center tusagassiutinut nalunaaruteqarput.

AAMMA ATUARUK Tamaat isigalugu: Coronavirus pillugu killiffik

Tamannalu Avannaata Kommuniani borgmesterip, Palle Jerimiassen uggoraa.

Borgmesterip oqarnera naapertorlugu aaqqissuisut Namminersorlutik Oqartussat corona pillugu aqutsisoqarfik qanimut oqaloqatigiissuteqarfigaat. Matumanilu katerinnissamut inuit 100-it amerlanerpaanissaanut peqqussut suli atuuttoq akissutigineqarpoq.

Tamanna pissutigalugu piniarneq aalisarnerlu pillugu Ilulissani nittarsaassinissamut pilersaarusiornerput aaqqissuussinissamullu piareersarnerput nangissinnaanngilarput, Avannaata Kommuniani borgmesteri Palle Jerimiassen oqarpoq.

PolarExpo aatsaat siullermeersumik Ilulissani aaqqissuunneqartussaagaluarpoq, tassanilu nittarsaassisut 40-t missaanniittut peqataasussaagaluarlutik. Taakkuli allatulli nittarsaassinerup aappaagu aaqqissuunneqarsinnaalernissaanut utaqqisariarput.

AAMMA ATUARUK Aalisarnermut nittarsaassinissaq Ilulissanut nuunneqartussanngortoq

- PolarExpop ukiorpassuani Sisimiuni angerlarsimasimasup Ilulissani ingerlanneqarnissaanut qilanaarsimagaluarpugut. Suli aamma KNAPK aamma Avannaata Kommunia suleqatigalugit aalisarnermut nittarsaassineq annertusillugu aamma piniarnermut nittarsaassisoqartussaagaluarpoq, Aalborg kongres & kulturcenterimi pisortaq, Nicolaj Holm oqarpoq.

Taassumali oqartussat kommunillu coronamik tuniluuttoqarnissaanut atatillugu malittarisassat malitaat paasisinnaallugit erseqqissaatigaa.

Nittarsaassinerup upernaamut aaqqissuunneqarnissaanut suli nutaanik ulluliisoqanngilaq.

Nittarsaassineq ukiut marlukkaarlugit aaqqissuunneqartarpoq.