Aalisarnermut nittarsaassinissaq Ilulissanut nuunneqartussanngortoq
Nittarsaassinerup nuunneqarnissaa nittarsaassinermik aaqqissuussisumit Aalborg Kongress & Kultur Centerimit, AKKC-mit, aalisartut piniartullu kattuffiat KNAPK peqatigalugu aalajangerneqartoq Avannaata Kommunianit tusagassiuutinut nalunaarummi allaqqavoq.
Polarfishillu Ilulissanut 2020-mi nuunneqarnissaa Avannaata Kommuniani borgmesterip, Palle Jerimiassenip, nuannaarutigaa.
- Uannut aalajangiisuuvoq, Aalborg Kongres & Kultur Centeri, nunanit tamanit tusaamaneqartumik, imminullu nappassinnaasumik ilisimaneqartumik suleqateqalernerput. Taamaattumik Europami aalisarnermut niuffatsitsinerit annersaannik ingerlatsivik Danfish International, Ilulissaniit suleqatigineqalernera pitsaanerusinnaanngilaq, borgemsteri nalunaarummi oqaaseqarpoq.
Aamma KNAPK-mi iluarisimaarinnipput.
- Ukiuni arlaqalersuni kissaatigisarsimavarput, Kalaallit Nunaata Avannaanut aalisarnermik saqqummersitsisarnerup nuunneqarnissaa. Tamannalu ukioq 2020-mut iluatsittoq nunatsinni aalisartunut nunamullu tamarmut iluaqutaalertussatut angusaq pitsaasuuvoq, KNAPK-p siulittaasua, Henrik Sandgreen, oqarpoq.
Nittarsaassinermi Polarfishimi aalisarnermut nutaaliornerit, periutsit atortullu nutaat saqqummersinneqartarput, tamatumalu saniatigut isumasioqatigiisitsisoqartarluni.
Ilulissat Timersortarfianni oktobarip arfernganit arfineq-pingajuata tungaanut Polarfishertitsisoqassaaq.
AKKC-mit ilimasuutigineqarpoq, Ilulissani aalisarnermut tunngasunik ukioq ataaseq allortarlugu ukiuni Aalborgimi nittarsaassinermik Danfishimik ingerlatsiffiunngitsuni saqqummersitsisoqartassasoq.
