Podcastimi nutaami Trumpip Kalaallit Nunaat pillugu anguniagai naalagaaffeqatigiinnermilu misigissusai pillugit qulaajarneqartut
Præsidenti Donald Trumpiuna suniartoq, Kalaallit Nunaat pillugu aqutsinissamik piginnilernissamillu oqaluleraangami? Sakkutooqarnikkut isumannaallisaanissaq pineqarpa imaluunniit USA-p killeqarfiisa allineqarnissaat? Aamma kalaallit danskillu akunnerminni misigissutsit suunuku maannakkorpiaq atorneqartut?
Tamakkuupput tusagassiortup atuakkiortullu Martin Breumip podcastimi "Cold Front - kampen om Grønland og Arktis " aallakaatinneqartaleqqammersumi apeqqutit ilaat misissorniagai.
Tassani pisut annerpaat ilaat maanna atuuttut pillugit paasisaqalersitsiniarluni, ilisimatusartut inuillu allat sammisamut tamatumunnga ilisimasaqarluartut aallakaatitassiorfimmut aggersarpai.
- Kalaallit Nunaat aatsaat taamak soqutigineqartigaaq. Nunarsuaq tamarmi pineqarpoq, pingaartumilli Danmarkimi, tassa Kalaallit Nunaanniit nutaarsiassat oqaluttuallu amerleriarujussuarneri misigaarput, Breum oqarpoq.
Martin Breum Kalaallit Nunaat Issittorlu pillugit ukiuni kingullerni 15-ini arlalinnik atuakkiorlunilu TV-kkut aallakaatitassiorpoq. Taassumalu Podcastimi aallakaatitassiornermi aqutsisutut suliarisimasanut allassinnaanngorpaa.
- Kalaallit Nunaat Issittorlu pillugit ulluni makkunani nutaarsiassarpassuaqarpoq, paasissutissat uumissuinertalippassuit, kukkunertalippassuit isummallu pigiliutiinnagarpassuit ataqatigiinnerulersitsinissamut paatsiveerussaataasinnaallutillu paatsuuititsisinnaasut.
- Ilisimatusartut ikiorsiullugit piviusunik ilisimatusarnermillu tunngaveqartunik, ataqatigiinnermi suna ilumoortuullunilu eqqortuunersoq paasisaqarfigilaarniarlugit aallakaatitassiorniarsarivugut. Tassa nutaarsiassanik isiginnaarlutillu tusarnaartartunut nutaarsiassiinermi paasinarsaanerulluta, taanna oqarpoq.
Inuit tukkortut pillugit oqaluttuaq
Podcastimi nutaami immikkoortoq siulleq qaammat kingulleq aallakaatinneqarpoq. Tassani Københavns Universitetimi ilisimatusartoq lektoriusorlu Kirsten Thisted, Kalaallit Nunaata Danmarkillu akunnerminni misigissutsit inituut pillugit oqaloqatigineqarnissaanut aallakaatitsivimmut aggersarneqarpoq.
- Danskit amerlasoorpassuit, Danskit Kalaallit Nunaanni ukiuni 300-ni suliaat iliuusaallu pillugit oqaluttuaminnik nalilersueqqilernikuupput. Danskit Kalaallit Nunaanni iliuuserisaat tamakkerlugit nunamut iluaqutaasut, taamaattumillu Danmarkimut nersorinninneq pillugu, Danmarkimi oqaluttuaqarpoq, Martin Breum oqarpoq.
Nunasiaanerup kinguneranik innarliinerit pillugit oqaluttuarpassuit ukiuni kingullerni qaqilerneqartalerput.
Niviarsiaqqat arnallu piumassuserinngisaminnik spiralilertittut pillugit oqaluttuat. Angajoqqaat akuersiseqqaarnagit nalorninartumik tunngavilimmik qitornavissianngortitsinerit. Ivittuuniit danskit umiarsui orsugiak tonsikkuutaat usillugit aallartut, Kalaallit Nunaannut iluaqutaanngitsumik aningasarpassuarnik nalilerlugit tunillugit.
- Nunasiaateqarneq tamakkerlugu aaqqissuussaasumik assigiinngisitsineqarluni kukkusoqarsimanera, danskinut amerlasuunut akueriuminaassinnaavoq. Pisarsimasut maanna oqaluuserineqarnialernerat danskinut amerlasuunut akueriuminaatsorujussuusinnaavoq.
- Oqaluttuamut tamatumunnga, amerlasuunit nuannarineqarsimaqisumut, danskinut amerlasuunut saqitsaanneq atornartuuvoq. Danskitut imminut qiviarluni, danskit tukkortuullutillu ajunngitsuunerinik saqqummiunneqarneri upperigaanni oqaluttuaq nuannersuuvoq, Martin Breum oqarpoq.
Akerleriinneq ilungersunartoq
Martin Breum aaqqissuisorlu Jakob Gottschau Videnskab.dk suleqatigalugu immikkoortunik aqqaneq-marlunnik aallakaatitassiorput.
Immikkoortup tullia tallimanngorpat aallakaatinneqassaaq, tassanilu Amerikap Præsidentiata Kalaallit Nunaannik tiguaanissamik anguniagai pillugit itisiisoqassaaq.
- Donald Trumpimik pisuminngarnit akerleriinneq pineqartillugu, Kalaallit Nunaata Danmarkillu akunnerminni maanna inissisimaffigisaaninngarnit pissutsit ilungersunarnerulersinnaaneri takorloorsinnaanngilara. Tamannali itisilissavarput, Breum oqarpoq.
Podcasti Nasiffik - Ilisimatusarfimmi Nunanut Allanut Sillimaniarnermullu Politikkimik Centeri- suleqatigalugu aallakaatitassiarineqarpoq.
Ilisimatusartut nittarsaassinerinik podcastinik amerlanerusunik tusarnaarusukkaanni KNR-ip podcastiani “Nunarsuup avannaanit ilisimasat” aamma tusarnaarneqarsinnaavoq.
