Paamiuni utoqqaat illussaata sanaartornera kinguaattuussangatinneqanngitsoq
Aperujussuarnera pissutigalugu sanaartorneq kinguaattoorfiuvoq, toqqaliviornissaanullu qaartitereqqittoqartariaqarsimanera pissutigalugu kinguaattoorutigeqqinneqarluni.
Aasalli ingerlanerani sanaartorneq ingerlalluarmat kinguaattoornerit angummaffigineqarsimapput, tamannalu borgmester Asii Chemnitz Narupip, sanaartorfimmut pingasunngormat alakkaterisup, nuannaarutigaa.
- Utoqqaat illussaata naammassinissaa qilanaareqaara. Paamiuni utoqqaat sivisuallaamik pitsaanerusumik atugaqalernissaq utaqqereerpaat, taamaattumik kinguaattoortoqaqqissanngitsoq tusarlugu nuanneqaaq, Asii Chemnitz Narup tusagassiorfinnut nalunaarummi taama oqarpoq.
Paamiuni utoqqaat illutaassaat 2018-ip naanerani naammassineqartussatut isikkoqartoq, sanaartornermik ingerlatsisup Frederikshåb Betoncentralip ilisimatitsissutigaa.
