Piviusulersaarusiaq Nunat Avannarliit Siunnersuisoqatigiivisa filminut nersornaasiuttagaanut innersuunneqartoq
![](/sites/default/files/styles/image_934x467/public/2024-06/Aaju%20Peter.jpg?itok=QpgXwe4r)
Piviusulersaarusiaq Nunat Avannarliit Siunnersuisoqatigiivisa filminut nersornaasiuttagaanut innersuunneqarrtoq
Piviusulersaarusiaq “Twice Colonized”, kalaaleq arnaq Aaju Peter pingaarnertut inuttaralugu filmiliaq, Nunaat Avannarliit Siunnersuisoqatigiit filmilianut nersornaasiuttagaanut 2024-mi innersuunneqarpoq.
Piviusulersaarusiaq 2023-mi saqqummersinneqaramili filmilianut nersornaasiuttakkanik aqqaneq-marlunnik nersornaaserneqarsimavoq, 21-eriarlunilu innersuunneqarsimalluni. Canadamiut Oscariannik kingulllermi nersornaaserneqarpoq.
- Pikkunaqaaq, nuanneqaaq. Piviusulersaarusiaalluarnerpaatut Canada Screen Awardsimi nersornaaserneqaqqammerpugut. Nunat Avannarliit Siunnersuisoqatigiivisa filmilianut nersornaataannut manna taava innersuunneqarnerput assut nuannaarutigaarput, tupinnaqaaq, assut nuannisarpugut,, Aaju Peter oqarpoq.
Piviusulersaarusiaq innersuunneqartussatut Kalaallit Nunaanni naliliisartunit innersuunneqarpoq, Film.gl-imi siulittaasoq Klaus Georg Hansen, filmiliortartoq, ilitsersuisoq filmiliamullu manuskriptiliortoq Nuna Paninnguaq Skydsbjerg, filmiliortorlu Ilannguaq Petrussen, innersuussinissamut toqqaasuupput.
- “Twice Colonized”-ip nersornaasigassartut innersuunneqarnissaanut toqqarparput, filmiliaalluarpormi. Kalaallit isiginneriaasiat aallaavigalugu filmiliaavoq, namminerlu ilisarisinnaasatsinnik oqaluttuarinnittoqarnera pingaaruteqarpoq.
- Filmiliaalluarporlu, nunanilu tamalaani unammeqataalluarsinnaalluni, Klaus Georg Hansen oqarpoq.
Attortinnarsimaqisoq
Kalaaleq Arnaq eqqartuussissuserisoq Aaju Peter piviusulersaarusiami pingaarnertut inuttaavoq, taassuma nunat inoqqaaviisa nunani tamalaani pisinnaatitaaffiii pillugit sukataaruteqarnera malinnaavigineqarluni.
Taassuma nunasiaataasimanermiinnermit maannamut ineriartornera piviusulersaarusiami aamma malinnaavigineqarpoq.
Aaju Peter, nunaqarfimmi inuerutitinneqareersumi Arkisserniami 1960-imi inunngorpoq. Aaju meeraagallarami Kalaallit Nunaanni ilaquttani qimallugit Danmarkimut aallartitaavoq. Tappavaniitilluni oqaatsit ilitsoqqussani kulturitoqqanilu annnaavai.
- Filmi piviusulersaarusiaq saqqummersinneqarmat pikkunarsimaqaaq. Filmiliortut uannut pittsaaqaat, filmiliornerup nalaani kissaatikka tamaasa ilumooorukkamikkit.
- Piviusulersaarusiat pingaarnerit ilaanniittoq ullumikkut isumaqarpunga. Oqaatsitsinnimmi kulturitsinnillu annaasaqarnitsinnut tunngassuteqarpoq, nunatsinnik annaasaqarnerput, nunaasiaataanerlu. Tamannalu pillugu oqaloqatigiinnissarput pingaaruteqarpoq, Aaju Peter, Canadami manna najugalik oqarpoq.
Twice Colonized ilitsersuisumit Lin Allunamit ilitsersuiffigineqarpoq, Aaju Peterilu ilitsersueqataalluni. Kalaallit flmiliortartut Ánorâk Filmimeersut filmilioqataapput.
Filmiliat arfinillit, Danmarkimeersut, Finlandimeersut, Kalaallit Nunaanneersut, Islandimeersut, Norgemeersut Sverigemeersullu Nunaat Avannarliit Siunnersuisoqatigiivisa filmilianut nersornaasiuttagaannut innersuunneqarput.
Kalaallit Nunaat filmiliamik siullerpaamik siorna innersuussisinnaalerpoq. Filmiliaq "Alanngut killinganni" siorna innersuunneqarpoq. Taanna Malik Kleistip ilitsersuisuuffigaa, Nunallu Avannnarliit Siunnersuisoqatigiivisa filmiliamut 2023-mi innersuunneqarluni.
Filmi Nunat Avannarliit Siunnersuisoqatigiivisa filmiliamut neersornaasiuttagaannik 2024-mi nersornaaserneqartoq, Nunat Avannarrlliit Siunnersuisoqatigiivisa Reykjavikimi ataatsimeersuarneranni oktobarip ulluisa 22-anni saqqummiunneqassaaq.