Piumasaq piviusorsiortuunngilaq

EU-p puisit amiinik tuniniaaqqusinnginnerata atorunnaarsinneqarnissaa anguniarneqartariaqarpoq Danmarkip EU-mi siulittaassuuffia iluatsillugu, taama inassuteqarput ICC aamma KNAPK. Taamatulli piumasaqarneq piviusorsiortuunngitsoq Naalakkersuisut siulittaasuat Kuupik Kleist isumaqarpoq.

EU-mi siulittaasuuffik Danmarkip januaarip aallaqqaataanit tiguaa. Tamanna iluatsillugu ICC-ip siulittaasuata, Aqqaluk Lynge-p qallunaat naalakkersuisui qinnuvigai puisit amiisa EU-mi eqquteeqqusaajunnaarsimanerisa atorunnaarsinneqarnissaa sulissutigeqqullugu.

Aamma taamatorluinnaq KNAPK isumaqarpoq. Oqarlutik puisit amiinik EU-mut eqqusseqqusiunnaarneq, Naalagaaffiit Peqatigiit Nunat Inoqqaavisa Pisinnaatitaaffii pillugit nalunaarutaannik unioqqutitsinerusoq.

Naalakkersuisut siulittaasuata, Kuupik Kleistip oqaatigaa, ukioq manna januaarip aallaqqaataaniit Danmarkip EU-mi siulittaasuuffik tigummagu, taanna aqqutigalugu aaqqiiniarnissaq piviusorsiortuunngitsoq.

- Danmarkip siulittaasuuffia eqqarsaatigalugu oqartariaqarpunga, ajoraluartumik tamanna piviusorsiortuunngilaq. Nalunngilarpummi EU-mi amerlanerussuteqarluartut puisit amiinik eqqusseqqusiunnaarnermik piumasaqarsimasut. Eqqarsaatigisariaqarpormi siulitaasuuffik tassaammat amerlanerussuteqarluartut isumaannik aallutaqarfissaq. Taamaattumik ilimagineqarsinnaavoq Danmarkimut ajornakusuussasoq eqqusseqqusiunnaarnerup atorunnaarsinneqarnissaa, Naalakkersuisut siulittaasuat, Kuupik Kleist oqarpoq.

Periarfissarli alla tikkuarneqarsinnaasoq Naalakkersuisut siulittaasuata oqaatigaa.

- Aaqqiiniarnissamut periarfissaq alla tassaavoq, januaarip naalernerani Nunatta OLT-mi siulittaasuuffik tiguppagu. EU-mut OLT-ip niueqateqarneranut tunngasut nutarterneqarnerat aqqutigalugu pineqartoq una nutarterinermi ilanngussinnaavarput. Tassami OLT-ip EU-llu akornanni niuernernut akornutaasinnaasorisatta peerneqarnissaat anguniassavarput, Kuupik Kleist oqarpoq.

OLT tassaavoq EU-p suleqatigiinnikkut kattuffissua, nunat qeqertallu imarpik ikaarlugu tikinneqarsinnaasut. Tassalu taanna januaarip 23-aniit Kalaallit Nunaata siulittaasuuffigilertussaavaa.

Naalakkersusiut siulittaasuata neriorsuutigaa, OLT-mi siulittaasuuffik tiguneqarsimaleriarpat, EU-kommissioni naapikkunikku puisit amiinut apeqqut tunngasoq saqqummiunneqarumaartoq. Kuupik Kleist-ili isumaqarpoq puisit amii Nunatsinneersut tuniniaqqittalerniarutsigit allamik qanoq iliuusissarsiortariaqartugut.

- Puisit amii nunanut allanut tuniniarniarutsigit taava periarfissatuaavoq nunanik tuniniaaffissanik ujarlerneq. Aammali pisisartut sunnerniarneqarnissaat naalakkersuinikkut anguniarneqarsinnaavoq. Tamannali aqqutigalugu sunniiniarneq ajornakusoortorujussuusoq oqaluttuarisaanerup takutereerpaa, taamaattumik periarfissatuaavoq nunanik allanik tuniniaaffissatsinnik ujarlernissaq, Naalakkersuisut siulittaasuat, Kuupik Kleist taama oqarpoq.

Erseqqissaatigissavarput, puisit amiisa EU-mut eqquteqqusaajunnaarneranni Nunatsinnit ammit pineqanngimmata, kisiannili toqqaannanngikkaluamik taakku eqqorneqarnerisa pilersippaat ammit Nunatsinneersut EU-mi pisiariumaneerunnerat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat