Piujuaannartitsineq toqqammavigalugu ineriartorneq nunat inoqqaavisa oqaluuserigaat

Inuit Issittormiut Siunnersuisoqatigiiffiata ICC-p siulittaasua Hjalmar Dahl, sapaatip-akunnerata siuliani Københavnimiippoq, piujuaannartitsineq toqqammavigalugu ineriartorneq nunallu inoqqaavisa pisinnaatitaaffii pillugit nunat tamalaat peqataaffigisaani ataatsimeersuartoqarnerani peqataalluni.
Allattoq Jonas Fievé
oktobarip 14-at 2015 05:19
Nutserisoq Mads Lynge

Ataatsimeersuarneq Nunat Inoqqaavisa Soqutigisaat tunngavigalugit Suleqatigiiffiannit nunanit tamalaanit suleqatigiiffigineqartumit IWGIA-mit ilaatigut aaqqissuunneqarpoq, soorlu aamma Saamit Kattuffiat, Nunallu Inoqqaavi peqatigalugit Ineriartorneq pillugu Suleqatigiiffik aaqqissueqataasoq. Danmarkip nunanut allanut tunngasunut ministereqarfia ataatsimeersuarnermut qaaqqusisuuvoq.

Nunat inoqqaavi ingelassani qulaani taaneqartuni pisariaqartitsineq naapertorlugu pisarialimmik tusaaniarneqarsimannginnerat ataatsimeersuarnermi tunuliaqutarineqarpoq, nunammi inoqqaavi nunarsuarmi najugaqarfimminni amerlaqisuni piitsuuneq pingaaruteqanngitsutullu pineqarnertik ajornartorsiutigivaat.

Naggueqatigiit Inuit Post 2015 Processimik imaluunniit Agendamik taallugu peqataanerat Hjalmar Dahlip saqqummiuppaa, piujuannartitsineq tunngavigalugu ineriartorneq Naalagaaffiit Peqatigiit iluanni Nunat Inoqqaavinut Ataavartumik Ataatsimiittartuni ICC-p Saamit Siunnersuisoqatigiivi, tassa Samerådit, peqatigalugit oqallittarnerni peqataasarsimanera ilaatigut saqqummiunneqarluni:

- Taamatut ataatsimeersuarneq aqqutigalugu nunat inoqqaavisa atugaat, kiisalu nunarsuup immikkoortuini nunarsuarlu tamakkerlugu suliniutini, ilaatigut Nunat Avannarliit Siunnersuisoqatigiiffianni Issittumilu Siunnersuisoqatigiinni, taamatullu Naalagaaffiit Peqatigiinni nunat inoqqaavisa peqataatinneqarnissaat qanoq pingaaruteqartiginersoq pillugu kingumut soqutigineqarlunilu eqqumaffigineqarneroqqilernissaa neriuutigaara, ICC Greenlandip siulittaasua Hjalmar Dahl oqarpoq.