Piujuaannartitsineq Qeqqata kommuniani pingaartippaat

Isumasioqatigiinnermi isummat nutaat qaffakaatinenqassapput isumassarsiallu nutaat eqqartorneqarlutik. Isumasioqatigiinnermi anguniarneqarpoq kommuunimi suliffissaqartitsiniarnerup pitsanngorsarneqarnissaa. Namminersorlutik Oqartussat Qeqqata Kommuniani suliffissaqartitsiniarnermut aningaasaliissuteqarpianngillat. Taamaammat kommuuni nammineq iliuuseqartariaqarpoq.

- Sisimiut Maniitsullu kommuneqatigiilernata inissinniarnera ilungersunarsimavoq, tamannalu ukiut sisamat atorlugit naammassineqarsinnaanngilaq. Isumasioqatigiinnermi anguniarparput kommuunimi suleqatigiinnerulernissaq. Kommuunitsinni suliffissaaleqisorpassuaqarnera pissutigalugu aallartinniarnerput ilungersunarsimavoq. Taamaammat Namminersorlutik Oqartussat kajumissaarumavagut suliffissatigut Nuuk salliutikkunnaarlugu illoqarfiit allat aamma isiginiarnerulissagaat, Inuussutissarsiornermut suliffissaqarniarnermullu Qeqqata Kommuniani ataatsimiititaliap siulittaasua Alfred Olsen KNR.gl-mut oqarpoq.

Suliffissaaleqineq kommuunip annertuumik ajornartorsiutigaa. Siornatigut Sisimiuni suliffissaaleqisut 40 - 50-it missaanniittaraluarput maannalu 200-nngorsimallutik. Taamaammat isumasioqatigiinnermi tamanna pingaarnertut sammineqassaaq.

- Neriuutigaarput Alcoap suliniutaa Namminersorlutik Oqartussanit akuersaarneqarumaartoq tamannami kommuunimi eqiiallaataassaqimmat. Inuit suliffissaqalerpata inigisamut meeqqerivinnullu akiligassat piffissaatillugu akilerneqartalissapput. Inuit akiligassanik akiliinaversaarneq ajorput, inuit ajornartorsioraluarlutik akisussaaffinnik naammassinninniartarput. Alcoa iluatsinngitsuussappat aallaqqaataaniit aallartittariaqassaagut aammalu sulisinnaasut ilinniaqqinnikkut piginnaanngorsarnissaat aalluttariaqassallugu, Alfred Olsen oqarpoq.