Pituffiup nunanut tamalaanut alapernaarsuiffinngortinneqarnissaa ajornakusuussasoq
Ilisimatusartorli isumaqarpoq Pituffiup nunat tamalaat akornannit aqunneqalernissaa piviusorsiunngitsoq.
Amerikamiut ukiut 60-it ingerlaneranni Pituffik tigummisarisimammassuk piffissanngorsimavoq nunat tamalaat akornannit aqunneqalernissaa, Issittorlu pillugu paasissutissat Naalagaaffiit Peqatigiinnut tunniunneqartalerlutik, IA'p Folketingimi ilaasortaatitaa Johan Lund Olsen taama isumaqarpoq. Taamaalilluni Issittumi eqqissineqaannarnissaanut sunniuteqassaaq.
Aamma atuaruk IA: Pituffik nunat tamalaat alapernaarsuiffigilissuk
Johan Lund Olsen taama oqarpoq. Tassali nunat tamalaat suleqatigiinnermikkut atomip nukinganik bakterianillu sakkussianik siaruarterinnginnissamut isumaqatigiissutip unioqqutinneqannginnissaa tassani nakkutigineqassasoq, taanna isumaqarpoq.
Canadami Ruslandilu malunnartumik Issittumi sakkussiortupilussuupput
Eqqarsaasersorneq tallimanngormat Folketingimi ammaanersiornermi aninneqarpoq, siusinnerusukkullu Namminersornermut Ataatsimiititaliarsuarmi sulinermut atatillugu Inatsisartuni isumaqatigiittunit akuerineqarsimalluni.
Inatsisissatut siunnersuutitut saqqummiunneqartinnagu Christiansborgimi partiinit eqqartorusunneqanngilaq.
Nunani tamalaani naalakkersuinikkut pissutsit pillugit danskit ilisimatusarfianneersup Jon Rahbek-Clemmensenip eqqarsaat periarfissippallaanngilaa. Danmarkimmi USA-llu akornanni pissutsit ajortissinnaangai, taanna isumaqarpoq.
- Pituffik Danmarkip USA-llu akornanni pissutsinut qitiusupilussuuvoq, danskit sillimaniarnerannut qitiunerpaajulluni. Pituffillu tassaavoq qallunaat naalakkersuisuisa nallukattaq tigummiaat, amerikamiut oqarfigisinnaallugit, aamma taakku suleqatigiinneq pissarsissutigigaat.
Ilulissani isumaqatigiissummik unioqqutitsinerussaaq
Aammattaaq Ilulissani isumaqatigiissummik unioqqutitsinerussaaq, naalagaaffiit tallimat isumaqatigiissimammata Issittumi eqqissineqarnissaa akunnerminni qulakkiissallugu, Jon Rahbek-Clemmensen oqarpoq:
- Isumannaallisaanermut ajornartorsiut FN-imut nuussallugu Ilulissani isumaqatigiissummut 2008-meersumut unioqqutitsinerussaaq. Ukiuni kingullerni arfinilinni taama suleqatigiinneq ingerlalluarsimangaluarpoq.
Pituffik nunat tamalaat akornanneersut suleqatigiiffigileraluarpassuk Danmarkip USA-mut nunanullu allanut attaveqarnerinut ajornartorsiutaanavianngitsoq Johan Lund Olsen oqarpoq. Eqqisseqatigiinnissamununa isumaqatigiissummik allilerineerusoq taanna oqarpoq.
