Pituffiup eqqaani Uummannatoqqami avatangiisinik saliineq naammassineqareerpoq
Pinngortitamut, Avatangiisinut Inatsisinillu atortitsinermut naalakkersuisoq, Mala Høy Kuko, Inatsisartunut ilaasortap Anthon Frederiksenip Partii Naleqqameersup §37 naapertorlugu apeqquteqaataanut akissuteqarluni taama allappoq.
Avatangiisinut ajoqutaasinnaasunik pakkersimaarinninnerup (saliinerup) naammassineqarneranut atatillugu ukiup ataatsip qaangiunnerani misissuisoqarpoq tamatumalu kingorna amigaataaluit iluarsineqarlutik. Suliassamut atatillugu malitseqartitsisussanik danskinit kalaalliniillu peqataaffigineqartunik pilersitsisoqarpoq, taakkulu februaarip 16-iani naggasiutitut ataatsimiipput, tassani malitseqartitsisut imminnut atorunnaarsillutik.
- Saliinissamik suliassaq taamaasilluni naammassineqartutut isigineqarpoq, Mala Høy Kuko erseqqissaavoq.
AAMMA ATUARUK Uummannatoqqami avatangiisinik saliinerup killiffia Antuup paaserusukkaa
Naalakkersuinikkut isumaqatigiissut naapertorlugu saliisoqarpoq, nunamerngup "Eqqakkatut ulorianartutut" immikkoortinneqartup Danmarkimut nassiunnagu Uummannatoqqami imaanit illuarlugu immikkoortinneqarnera eqqaassanngikkaanni.
EU-mi malittarisassaq, nunaminermik EU-mut eqqussinissamik inerteqquteqarfiusoq tamatumunnga pissutaavoq. Nunamineq taanna naatsorsuutigisamit annertunerujussuusimavoq. Nunamineq 3500 tonsiusoq assanneqartoq eqqakkatut ulorianartutut immikkoortinneqarpoq, suliarinnittussarsiuussinermi ilimagineqartut 50 tonsiugaluartut.
Naalakkersuisuusimasut 2013-imi aggustimi aaqqiissut taanna siulittaasup aalajangiineratigut akuerisimagaat, Mala Høy Kuko Anthon Frederiksenimut akissuteqarluni taama allappoq.
