Pituffik pillugu suliaq matoqqasorujussuarmik ingerlanneqartoq

KØBENHAVN: Suliffeqarfiit assigiinngitsut soorlu Greenland Contractors, maannakkut ingerlatsisuusoq tupigusuppoq amerikamiut suliffeqarfiutaata suliassaq tigusimammagu, naak isumaqatigiissummi allassimagaluartoq qallunaat kalaallillu suliffeqarfiisa suliassaq ingerlatissagaat.

Immikkulli ilisimasalik oqarpoq suliffeqarfiit aporfissaqassaqisut.

Ingerlatsiviit Pituffimmi kiffartuussinissamik isumaqatigiissummut neqerooruteqarsimasut ippassaq nunanut allanut tunngasunut ministereqarfimmi ataatsimiinnermut takkussuussimapput.

Tassani nassuiaateqaqqusisimapput qanoq ililluni amerikamiut suliffeqarfiutaat  inatsisilerituup sjællandip avannaani  nalunaarsorneqarsimasumut piginneqatigiiffiatut  - suliariumannittussarsiorneq taassuma ajugaassutigisinnaaneraa.

Danmarkip/Nunatta USA-llu akornanni Illersornissamut isumaqatigiissummi allassimavoq kalaallit qallunaalluunniit suliffeqarfiutaasa kisimik kiffartuussineq suliarisinnaagaat.  

Tamannali pillugu  Dansk Industri, Nunanut allanut tunngasunut ministereqarfik, Namminersorlutik Oqartussalluunniit oqaaseqarusunngillat.

Inatsisilli eqqarsaatigalugit suliffeqarfiit inissisimanerat ajorpoq,  Copenhagen Business Schoolimi professori Søren Friis Hansen oqarpoq.

Amerikamiut suliffeqarfiutaata Danmarkimi adresseqarnermigut  malittarisassanik malinnippoq.

- Ingerlatsiviit pillugit inatsimmi nutaami 2009-meersumi taamaallaat piumasaqaataavoq, ingerlatsivik Danmarkimi adresseqarsinnaasoq. Ima paasillugu aamma nunanit allaniit aqunneqarsinnaasoq.

- Illersornissamut isumaqatigiissummi immikkut allassimasoqanngippat, taamaallaat allassimalluni qallunaat suliffeqarfigissagaat - taava taakku piumasaqaat eqqortippaat.

KNR-illi attavii toqqammavigalugit maanna politikkikkut tamaviaarutigalugu sulissutigineqarpoq. Kalaallimmi soqutigisaat tassani pineqarmata.

Suliffeqarfik isumaqatigiissutinnattoq Danmarkimi nalunaarsorneqarsimagaluarluni, Illersornissamut isumaqatigiissutip isumaanut assortuuppoq, tassanimi Kalaallit Nunaanni sullivinnik pilersitsinissamik qulakkeerisussaavoq, USA'p Pituffimmiinneranut akiliutitut.

Taama oqarpoq Jon Rahbek-Clemmensen, Nunanut allanut tunngasunut Danmarkimi ilisimatusarfimmi ilisimatusartoq.

- Allaannginnami Nunanut allanut tunngasunut ministereqarfimmi una qaangiataaginnarneqarsimasoq, imaluunniit eqiingaffigineqanngitsoorsimasoq.

- Taamaassimappat, amerikamiut suliffeqarfiutaata isumaqatigiissutip tunngavia akerlilerlugu pisimappat, Nunanut allanut tunngasunut ministereqarfimmiut pinngitsoortinniarsimasussaagaluarpaa. Taakkumi Naalagaaffeqatigiit soqutigisaat amerikamiunut illersortussaagaluarpaat.