Pituffik pillugu aalajangiiffigisassatut siunnersuuteqalersaartut
DANMARK: USA-p Pituffimmik atuinissaanik Danmarkip isumaqatigiissutaa pitsaasuuvoq.
Danskit nunanut allanut ministeriat, Martin Lidegaard, Folketingimi tallimanngormat isumasiorneqarnermini arlaleriarluni taama oqarpoq. Partiinit saamerlernit talerperlerniillu apeqquteqarfigineqarpoq - ilaatigut Kalaallit Nunaat EU-mut ilaasortaanngikkaluartoq EU-p suliariumannittussarsiuussisarnermut malittarisassai pissutigalugit Pituffimmi sakkutooqarfimmut atatillugu suliariumannittussarsiuussinermi periutsimik sooq allanngortitsisoqarsimanersoq apeqqutigineqarluni.
Aamma apeqqutigineqarpoq danskit nunanut allanut ministeriaqarfiata suliariumannittussarsiuussinermi periutsimik allanngortitsisimanera sooq Inatsisartunut, Folketingimut aammalu USA-p peqataaffigisaanut Joint Committeemut Permante Committeemullu ilisimatitsissutigineqarsimannginnersoq?
Nunanut allanut ministeriaqarfiup suliffeqarfiit Pituffimmi kiffartuussinissamik isumaqatigiissummut neqerooruteqarusuttut siornatigut akuereqqaartaraluarpai, maannali amerikamiut sakkutooqarnermut oqartussaasui suliffeqarfimmik kiffartuussinermik ingerlatsisussamik nammineerlutik toqqaasalersimapput.
Pituffik pillugu apeqquteqaat aallaavigalugu oqallinnissamik siunnersuuteqarniartut
Ministerilli akissutai naammanngillat, Kalaallit Nunaannut tunngasunut ataatsimiititaliami siulittaasoq Johan Lund Olsen, Inuit Ataqatigiinneersoq, isumasioqatigiinnerup kingorna oqarpoq.
- Akissutai naammaginarpallaanngillat. Tamannalu allanik apeqquteqarnissamut pissutissaqalersitsivoq.
Kalaallit Nunaannut tunngasunut ataatsimiititaliamut ilaasortat Pituffimmi sakkutooqarfiup atorneqarnera pillugu Folketingi tamarmi akuliutsinneqassanersoq maanna isumaliutigigaat, Johan Lund Olsen oqarpoq.
- Taamaammat ataatsimiititaliami aalajangerpugut januaarip qiteqqunnerani apeqquteqaat aallaavigalugu oqallinnissamik siunnersuuteqarniarluta tamannalu aalajangiiffigisassatut siunnersuuteqarnermik malitseqaratarsinnaavoq - tassalu Folketingimit aalajangiiffigineqarluni.
Inatsisissatut siunnersuutip suna imarissavaa?
- Tamanna partiit oqaaseqartartuisa akunnerminni suliarissavaat, Johan Lund Olsen oqarpoq.
EU-mut malittarisassanut EU-llu malittarisassai matumani atuutsinneqassanersut pillugit?
- Suliami matumani tamanut tunngatillugu. Allannguisoqanngippammi Kalaallit Nunaat suliffippassuarnik annaasaqaratarsinnaavoq. Kalaallit Nunaanni aningaasaqarniarnikkut ilungersunartumik inissisimanitsinni nunatta karsia 200 millionit koruunit sinnerlugit annaasaqaratarsinnaavoq, Folketingip Kalaallit Nunaannut tunngasunut ataatsimiititaliaani siulittaasoq oqarpoq.
