Pitsaassutsimik nalunaarusiat politikerinut saqqqummiunneqanngillat
Nalunaarusiat kommunemi atuartitaanermut ataatsimiititaliamut saqqummiunneqanngillat atuarfiit arlaqartut nalunaarusiorsimanngimmata.
KNR-imi siusinnersukkut oqaluttuarineqarpoq, kommune kujallermi atuarfiit pitsaassusiannik nalunaarusiat suliarineqarsimanngitsut, atuarfiit pillugit aqutsisoqarfimmi sulisussaaleqineq pissutigalugu.
Aamma atuaruk Sulisunik amigateqarneq pissutigalugu nalunaarusiat suliarineqanngillat
Nalunaarusiat inatsisisitigut pisusaaffiupput, atuarfimmi atuartut ilinniartsisullu pillugit paasissutissanik imaqartut, ilaatigut atuartup angusarisimasai, ilinniartitsisut atuartullu napparsimanerannik imaluunniit atuartut patsisissaqanngitsumik atuariartorsimannginnerannik nalunaarusiornerit.
Pitsaassutsimik nalunaarusiat pingaaruteqarput. Suliniutinik anguniagassatut isumaliutigineqartunik angusarineqartunilllu imaqartussaapput. Meeqqat atuarfiini pissutsinik ajornannginnerusumik malinnaanissamut atorneqassapput, ajornartorsiuteqarpallu kommunalbestyrelsemit paasineqassamat, Kaali Olsen Namminersorlutik Oqartussani ilinniartitaanermut nakkutilliisoq KNR-imut taama oqarpoq.
Aamma atuaruk Kommune Kujallermi meeqqat atuarfiisa inatsit unioqqutippaat
Qaasuitsup kommuninai kultureqarnermut atuartitaanermut sunngiffimmilu aqutsisoqarfimmi pisortaagallartoq Else Marie Ravnhøj Johansen KNR-imut nalunaarpoq, kommunemi atuarfiit ilaannit nalunaarusianik arlalinnik tigusaqarsimallutik taakkua ukiut atuarfiusut 2013/14 aamma 2014/15-mi. Atuarfiilli tamarmik nalunaarusiorsimanngillat, taakkualu kommunalbestyrelsemut saqqummiuneqarsimmanngillat.
Qaasuitsup kommuneani atuarfiit aqutsiveqarfianit oqaatigineqarpoq aqutsiveqarfimmi sulisusssaleq pissutigalugu nalunaarusiaq suliarineqarsimanngitsoq.
Kultureqarnermut, Atuarfeqarnermut Sunngiffimmullu ataatsimiititaliami siulittasup Kristian Brobergip pitsaassutsimik nalunaarusiat pillugit aqutsiveqarfimmit ilisimatinneqarsimanngilaq
- Atuarfeqarnermut aqutsisoqarfimmit pitsaassutsimik nalunaarusiat nalunngikkunikkit kommunalbestyrelsemut saqqummiuttartussaavaat, taammaattumik paasiuminaatsippara aqutsisoqarfiup uagutsinnut saqqummiuttarsimanngimmagit, atuarfeqarnermut ataatsimiititaliami siulitaasoq Kristian Broberg taama oqarpoq.
Atuartitaanermut aqutsiveqarfimmi sulisut naammattut sulisorineqalerpata pitsaassutsimik nalunaarutit komunalbestyrelsemut saqqummiunneqartalissasut siulittaasup neriorsuutigaa,
- Atuarfeqarnermut aqutsisoqarfimmi sulisoqarnerup aaqqiivigineqarnissaa naatsorsuutigilluinnarparput taavalu pitsaassutsimik nalunaarusiat, pitsaassutsimillu nalunaarusiat tamatigut, tamanit nassiunneqaraangata kommunalbestyrelsemut saqqummiunneqartasasut, Qaasuitsup Kommuneani Kultureqarnermut, Atuarfeqarnermut Sunngiffimmullu ataatsimiititaliami siulittasoq Kristian Broberg oqarpoq.
Atuarfeqarnermut aamma PPR Avannaani pisortaq Christian Jensenip oqanera naapertorlugu Qaasuitsup Kommuniani illoqarfinni qulingiluani atuarfiit aamma nunaqarfinni atuarfiit 30-it ukiup atuarfiusoq 2014-15 pillugu pitsaassutsimik nalnaarusianik tunniussisimasut.
Inatsit naapertorlugu Kommunalbestyrelsep nakkutigisussaavaa nalunaarusiat tunniunneqarsimanersut taakkualu ukiut tamaasa 1 oktober nallertinnagu tunniunneqartassapput.
